Къайсы иги болгъанын жамауат кеси сайлайды

23 мартдан башлап химия затла къошулмай ёсдюрюлген битимлени, кёгетлени сайлар муратда битеуроссей къол кётюрюу башланнганды. Жамауат «Халкъ сайлагъан органика бренд» деген номинациягъа къатышханланы айырлыкъдыла. Ким сюйсе да, Роскачествону сайтында къыралны 19 регионундан 19 предприятияны конкурсха кёргюзтюлген продукциясы жанлы къол кётюраллыкъды. Конкурсха къатышхан эл мюлк предприятияланы продукцияны органика жорукълагъа кёре ёсдюргенлерини юсюнден сертификатлары бардыла.

Кабарты-Малкъардан бу эришиуге «Бай тирлик» эл мюлк предприятие къатышады. Ол республиканы тау этеклеринде алманы алты тюрлюсюн ёсдюреди. Аны баш директору Байдаланы Зулкъарнейни айтханына кёре, Шимал-Кавказ федерал округда, саулай къыралны юг жанында аллай продукция ёсдюрген жангыз предприятие буду.

Роскачествону сайтында къол кётюрюу 24 апрельге дери бардырыллыкъды.