Тазирни заманында тёлеу изленеди

Россейни Сюд приставланы федерал службасыны КъМР-де Управлениясыны къуллукъчулары жолда жюрюуню къоркъуусузлугъуну инспекторлары бла бирге Черек районда «Борчу болгъан» энчи жумушла бардыргъандыла. Бу иш водительлеге жолда жюрюуню жорукъларына бузукълукъла ючюн тазирни заманында тёлерге кереклисин, аны болжалын созгъанда, жууаплылыкъны  эсгертир мурат бла къуралгъанды, деп билдиргендиле бизге  ФССП-ны КъМР-де Управлениясыны пресс-службасындан.

- Административ тазирни, бегим чыгъарылгъан кюнден башлап, 60 кюнню ичинде толтурургъа  керекди. Алай аны заманында тёлемей, борч 10 минг сомдан озса,  машинаны жюрютюрге эркинликге чекле салыныргъа боллукъдула,-деп ангылатхандыла приставла.

Тазирни заманында тёлемеген жууапха тартылады,  ол санда аны ёлчеми эки кереге кёбейтилирге, неда инсанны 15 кюннге эркинлиги сыйырылыргъа, башха чекле кийирилирге боллукъдула.    Приставла адамны мюлкюне арест салыргъа, инсаннга тыш къыралгъа барыргъа эркинлигин болжаллы халда тыяргъа да эркиндиле. Быллай жууапны борчну ахырда тёлемегенле неда аны бир кесегин къайтаргъанла да тутарыкъдыла.

Право  низамны сакълаучула бла приставла тазир салыннганыны бла къалгъаныны юсюнден шартла Къырал автоинспекцияны сайтында  ( www.gibdd.ru) «Тазирлени тинтиу» бёлюмде, толтуруу бегим ачылгъанын а УФССП-ны сайтында «Толтуруу бегимлени тизмеси» бёлюмде басмаланнганын эсгертгендиле водительлеге.

Ангылатыу жумушланы ахырында приставла бла полициячыла водительлени жолда жюрюуню жорукъларын сакъларгъа, бузукълукъ этилген эсе уа,  тазирни заманында тёлерге чакъыргъандыла.