Не жаны бла да тынгылы эмда омакъ

Къабарты-Малкъарда "Юйюр" миллет проектге кёре иги кесек  иш бардырылады.  Билим бериуню юсюнден айтханда, былтыр  муниципалитетледе сабийле  школгъа дери жюрюген  юч  учрежденияны ишлерге белгиленнген эди. Анга кёре,  бюгюнлюкде Кёнделенде жюз сабийге садикни къурулушу къыстау барады, деп билдириледи КъМР-ни Къурулуш эмда жашау журт-коммунал мюлк  министерствосуну пресс-службасындан.

Былтыр подряд организация сайланнгандан сора,  аны келечилери мекям ишленирик  жерни  тазаларгъа, тюзетирге эм мурдорун  салыргъа да  жетишгендиле. Бюгюнлюкде уа аны къабыргъаларын къызыл кирпич бла  къалап, бетондан чигинжиле, аркъаула къуюп эм  башха жумушланы да  тамамлап бошай турадыла.  Мекямны къурулушунда тынгылы   материалла эм жангы технологияла да  хайырланыладыла. Саулай алып айтханда,  къурулушу тийишли стандартлагъа кёре бардырылады. Садик битсе, анда жюз сабийге бар онгла къураллыкъдыла. Ала жыл санларына кёре эркин бёлюмледе орналлыкъдыла. Хар бирини ойнагъан, жукълагъан, ашагъан отоулары боллукъду. Андан сора да, музыкадан дерс бардырырча залы, уллу ашханасы эм  администрацияны бёлюмю да жарашдырыллыкъды.

Кёнделенде жангы садик –  ол эм биринчи  келир тёлюлеге къайгъырыуду. Бу мекям билим бериуде, юйретиуде шёндюгю амалланы хайырланнган педагогла ишлеген, сабийлеге уа ойнаргъа, заманларын зауукълу ётдюрюрге, окъургъа кенг онг берген ара боллукъду.

Эсге сала айтсакъ,"Юйюр" миллет проектни магъанасы -  юйюрлени жашау болумларын  игилендирир  онгла къураргъа. Анга, социал болушлукъдан тышында, демография, жашау журт бла жалчытыу, билим бериу, маданият эм башха бёлюмле да киредиле. Ол былтыр январьда ишлеп башлагъанды эм беш  жылны  бардырыллыкъды.

Планнга кёре,  садик 2027 жылны ахырындан кеч къалмай, хайырланыргъа берилирге керекди.