«Каратени ниетлери манга жууукъдула»

Ностуланы Ислам умутландыргъан спортчуларыбызны араларындады, ол каратеде жетишимлери бла белгилиди. Юлгюге, алгъаракълада Москвада ЦСКА-ны спорт единоборствола мекямында «Киокушинкай-каратеден федерацияланы содружестволарыны кубогу» деген III халкъла аралы эришиу къуралгъанды. Анга кёп къыралдан 300-ден аслам каратечи къызла бла жашла къатышхандыла. Анда 70 килограммгъа дери ауурлукъ Ностуланы Ислам (кесини ауурлугъу 64 кг.) жетишимли болгъанды. Ол, абадан жыл сан къауумда сермеше, эки саугъагъа тийишли болгъанды – ючюнчю жер алгъаны ючюн доммакъ майдалгъа, сора эм терк нокаут этгени ючюн да энчи белгиленнгенди. Ислам къыралны жыйымдыкъ командасына киреди, бизни бла ушагъында ол спорт бла къалай кюрешип башлагъаныны, алда къаллай муратлары болгъаныны юсюнден айтханды.

Ислам Кёнделенде Ностуланы Расулну бла Мечиланы Лейляны юйюрлеринде туугъанды. Юйюр Нальчикге кёчюп, мында тогъузунчу номерли школну тауусханды, усталыкъ билим алыргъа Белгород институтну филиалына киргенди, юридический жанын сайлагъанды.     Спорт бла жети жылында мектепде спорт залда кюрешип башлагъанды, биринчи тренери Артур Унежев болгъанды, анда он жылны жарау этгенди. Биринчи классда окъугъанында, каратеден секция ачылгъаныны юсюнден билдириуню кёреди. Ол къууанчы бла юйге келип, таматалагъа ары жюрюрге сюйгенини юсюнден билдиреди. Сора, атам бла келип, мени секциягъа жаздыргъан эди. «Алгъа мени гимнастикагъа берирге сюе эдиле, алай, насыпха, баргъан кюнюбюзде ол жабылып болгъанды. Брюс Лини, Джеки Чанны киноларына къарагъанма, ала этгенни кесим да къайтарыргъа кюрешгенме. Бусагъатда алача устала бардыла деп  билмейме. Шёндю эришиулеге къатышханда, къаршчы спортчуну хорларгъа, тюненеден эсе бюгюн кючлю сермешгенинги кёргюзтюрге итинесе», - деп эсгереди ол.

Фахмулу гёжеф алгъа кесин ММА-да сынаргъа сюйгенди, анда аудуруу приёмланы этерге юйренирча дзюдогъа жюрюп да тебирегенди. Алай спортну бу тюрлюсю анга келишмегенин терк тюшюннгенди. Инсан сайлагъан ишинде уста болургъа керекди деген оюмну тюзге санап, къатыш единоборстволада сегиз айны тургъанды, алай алада каратедеча низам, философиялары болмагъаны кёлюне жетмегенди. Алай бла ол эки жылны ичинде каратени унуталмагъанды, жюреги артха тартханды. Алгъыннгы тренерине къайтханды, алай анда абадан жыл санда спортчула, спарингле этерге нёгер болмагъаны ючюн,  Мурат Думанишевге кёчерге тюшгенди, Артур Унежев бу оноууна угъай демегенди. 

Ислам сайлагъан киокушинкай каратени эм къаты тюрлюсюдю, аны ючюн аны Олимпиадагъа къошаргъа сюймейдиле. 14 жылдан сора, къол къапсыз, 16 жыл толгъандан сора, шлемсиз сермешесе, 18-34 жылда уа юсюнгде чып тюшюуден сакълагъан бир зат къалмайды. Ачыргъа, чып тюшерге къоркъуу бек ёседи. Каратени энчи философиясы барды. Ол адамны къарыулу, терк этгенинден тышында, аны сабырлыкъгъа, тёзюмлюлюкге юйретеди, ниетин кючлейди, огъурсузлукъну унамайды. Мында къаршчы спортчугъа, тенглеринге намыс эте билирге керексе – бу ниетле жаш адамны жюрегине, къылыгъына да жууукъ эдиле.

-Жарау этгенде, адамла асламысында спортну олимпиада тюрлюсюн сайларгъа итинедиле, карате уа аладан тюйюлдю.

- Секциягъа жазылгъанда, аны юсюнден сагъышым болмагъанды, - дейди спортчу. - Олимпиадагъа тюшер ючюн, техника жаны бла кючлю болургъа, иги сынам жыяргъа керекди. Аны ючюн а, айтханымча, спортну ол неда бу тюрлюсю бла гитчеликден кюреширге тийишлиди. Алгъаракълада каратени ашихара тюрлюсюн Олимпиадагъа къошаргъа боллукъларыны юсюнден билдириуле чыкъгъан эдиле, алай ол башламчылыкъ къабыл кёрюлмегенди. Бусагъатда да бу жаны бла иш бардырылады, заявка ийилгенди, энди жууапны сакълайбыз. Ашихара киокушинкайдан башхаракъ болгъанлыкъгъа, биз эки тюрлюсюнде да сермешебиз.

Эришиулеге къатышып ол 8 жылында башлагъанды, биринчи «алтынын» республикалы биринчилигинде къытханды. Андан сора округда, къыралда да кёп тюрлю эришиуледе сермешгенди, алай эм уллу жетишимине уа башда сагъынылгъан доммакъ майдалны санайды.

- Москвада зал къайда болгъанын табалмай, эришиуге бир кесек кеч да къалгъанбыз, - деп эсгереди ушакъ нёгерибиз. - Аны хатасындан сермешге хазырланыргъа заманым аз да болмагъанды. Биринчи тюбешиуюм Белоруссиядан къара бел-баулу спортчу бла эди, ол кеси да менден он жылгъа тамата эди, аны минут бла жарымгъа нокаут бла  хорлагъанма. Аны ызындан индиячы Баихинер Сингхни беш такъыйкъаны ичинде нокаутха жибергенме, ол эришиуде эм къысха тюбешиуге саналгъанды. Ючюнчю сермешим а Калининграддан бек сынамлы каратечи бла эди, аны бла сермешни ахырына дери бардыргъанма, судьяланы оноулары бла хорлам анга берилгенди. Андан сора,  башха тренерле келип, аны бла аллай бир заманны алыкъа бир спортчу да сермешалгъанын айтхан эдиле. «Доммакъ» ючюн сермешибиз 9 минутну баргъанды, анда хорлар ючюн, битеу кючюмю салгъанма. Къыйын келген майдал бютюн багъалыды, аны къолунгда тутхан бютюн хычыуунду, нек дегенде аны алыр ючюн, кесинги аямай кюрешесе, чексиз арыйса.  Сора, сермешгенде хар заманда да къаршчы спортчуну тюз да кёзлерине къараучума.

Анда Ислам 5 такъыйкъаны ичинде хорлагъанды. Татамиден алай терк къалай чыгъалгъанса деген соруугъа жууап бере, ол терклик ким бла сермешгенинге кёре болгъанын чертеди: «Бирде мычымай уруп башласанг игиди, бирде уа бир кесек къараргъа, ура, артха кете турургъа, къаршчы спортчуну сынаргъа керек болады. Сора, шахматладача, аны халатларын заманында эслерге, бусагъатда уа бу приём тапды деп ойларгъа тийишлиди».

Хорламын ол, анам мени хар сермешиме къарайды, кимден да бек мени ючюн ол жарсыйды, къыйын сагъатда кёл этдиреди, спорт, окъуу, къылыкъ жаны бла да иги болурума къайгъырады  деп, анасына  жоралайды.