Тутхан ишинде бийик жууаплылыгъы болгъанды аны

Аналаны Татыу бла Айшат Бызынгыда тогъуз сабий ёсдюргендиле. Жашауну къыйынлыгъын, тынчлыгъын да сынай, жарсыгъан, къууаннган да эте, балаларына билгенлерича акъыл бере, адепге-намысха юйретгендиле.  Ала узакъ тау элде жашасала да, эл турмушну не кёп ауарасы болса да, сабийлерине билим берирге уа итиннгендиле, аланы тогъузундан жетисине бийик билим да бергендиле. Бюгюнлюкде ала кеслери юйюрле къурагъандыла, атала, анала болгъандыла. Бирер жерде ишлейдиле.

Татыуну бла Айшатны сабийлеринден Байдуллахны юсюнден а эллилери энчи айтадыла. Байдуллах Орта Азияда туугъанды. Малкъар халкъ Ата журтуна къайтханында, анга 8-9 жыл болуп, школгъа жюрюген эсли жашчыкъ эди. Бызынгыны школун бошагъанында, эл мюлкге ишлерге итиниую болгъанын кёрюп, колхоз оноучула жиберип, ветеринария факультетге киреди. Андан къайтып, колхозда бир кесек да ишлегенди. Жюреги уа милициягъа тартханы себепли, анга да биягъы окъуп, сюйген ишине киреди. Байдуллах бек фахмулу, хунерли адам болгъанды. Гитчелигинден окъуна спортха да сюймеклиги уллу эди. Студент заманында, милицияда ишлеген жылларында да‚ эркин тутушуудан республикалы, россейли эришиулеге къатышып, алчы жерлеге чыкъгъанды. Кёп грамотала бла да саугъаланнганды. Къыргъызстанда, Къазахстанда эришиуледе биринчи жерле алып къайтханды.

Милицияда алты жыл бла жарым ишлегенден сора, Ана улу Аттоланы Салих атлы колхозгъа къайтады. Ол кезиуде Байдуллах милицияны майору эди. Элинде ишлегенде уа, школда сабийлени да юйретип тургъанды.

«Охо да, энди маллагъа багъа да билеме», - деп, тынчайып къалмай, китапла окъуп, жангы затла билирге итиннгенин анасы, жиляй-жиляй, эсгериучю эди. Баям, билими терен болгъаны да аны бла байламлы эди. Ауругъан малланы кеси дарман, энчи багъыу этип, ёлюмден къутхарып тургъанды. Кёбюсюнде тууарла бузоу табалмай къыйналып ёлюучюдюле. Байдуллах а аллай ийнеклени жарып, ичлеринден бузоуларын да алып, алагъа багъып тургъанын эллилери уллу хурмет бла айтадыла.

Ким биледи, уллу ветеринар клиникалада алимле да хайырлана болурла аллай амалланы. Алай бызынгылы жашны аллай билими къуру кеси элине угъай, республикабызны башха эллерине да юлгю болгъанды. Малланы къояйыкь да, адамы ауругъанла да келгендиле болушлукъ излей Байдуллахха.

- Бир кюн элибизден кёкюреги тынгысыз этген бир тиширыу келеди, - деп эсгериучю эди анасы Айшат. – Байдуллах а, аны рентген суратына къарап, юйюнгде олтуруп турмай, больницагъа бар деп, ашырады. Ол юйюне кетгенлей а, манга: «Да муну ол аман ауруу бийлегенди», - деп, кючсюнюп, жарсыйды. Мен а: «Телими болгъанса, къалай айтаса», - деп, ачыуланнган окъуна этеме. Ол ауругъан тиширыу, шахаргъа барып, анализле да бергенинде, мал доктор салгъан диагноз керти болгъанды.

Узакъ тау элде аллай жаш болгъанын билип, Москвадан ишге чакъырыу къагъыт келгенде уа, Байдуллах кеси тёшек эди. Сау болмазлыгъын билгенинден сора уа: «Не да болсун, мухуруму тышына бермегиз!» - деп, тилеген эди. Ма бюгюн да аны гитче кьарындашы Даниял, Байдуллахны осуятын толтура, аны ишин бардырады. Ол Бызынгыда мал доктор болуп ишлейди.

Ахшы эллисин Жабелланы Сагъытгерий былай эсгериучю эди: «Сабийлигинден окъуна къоншуда ёсгенди, тутхан ишине жууаплылыгъы уа башха тау элледе да белги болгъанына ишексизме. Къалайгъа дууагъа жыйылсакъ да, мени таныгъанла, бызынгылы болгъанымы билгенле, Байдуллахны операцияларын айтып, сейир этиучю эдиле». Ким да къайсы ишни тутса да, аны иги окъуп, тынгылы бардырыргъа борчлуду. Байдуллах да ол ниети бла эрикмей окъугъанды. Бир да уллу кёллю болмай, охо да мен энди кёпню билеме деп турмай, арымай-талмай кюрешгенди. Аны себепли жамауаты аны унуталмайды.

Элни керти адамы замансыз кетгенди. Андан бери кёп жыл болады, алай бюгюн-бюгече да кёпле аны сюйюп эсгередиле. Ахшы ишлери, татлы сёзю бла да эллилерини эслеринде къалгъанды ол.