Жол уллу кёллюлюкню кечмейди

Быйыл январь эм февраль айлада Къабарты-Малкъарны жолларында 86 авария болгъанды (былтыр – 87), алада алгъан ауур жараладан 17 адам ауушханды, 116 инсан тюрлю-тюрлю жарала алгъандыла. Тенглешдирип айтханда, аварияланы асламы – 22-си – Нальчикде болгъандыла, ызы бла Басхан (16 авария), Чегем (11) эм Зольск (10) районла келедиле. Жолда болум Май районда ышаннгылыды дерчады, жылны аллындан бери анда эки авария болгъанды, насыпха, алада бир адам да ауушмагъанды, юч адам жарала алгъандыла. 

Черек, Элбрус эм Лескен районлада да эки айны ичинде ючюшер авария болгъанды.  
УГИБДД-ны пресс-службасындан бизге билдиргенлерича, асламында аварияла машинала бирге къагъышханларыны (41), жолдан бир жанына чыкъгъанларыны (20) хатасындан болгъандыла. 13 кезиуде уа водитель жаяу адамны басдыргъанды, жарсыугъа, бир адам ауушханды, 12-си жарала алгъандыла. 

- Водитель кесини полосасындан аллына келген машиналаны жолуна чыкъгъан неда аллында баргъан транспортну озгъан кезиуде аварияланы хатасы бютюнда уллуду. Жылны аллындан бери аллай 11 ДТП-да 8 адам ауушханды, 21 уа жаралы болгъадыла,-дегендиле бизге ведомстводан.

Федерал жоллада 34 авария болгъанды, ол а, былтырны бу кезиую бла тенглешдиргенде, 13,3 процентге кёпдю. Алада он адам ауушханды, 49-су тюрлю-тюрлю жарала алгъандыла. Регион даражалы трассалада 23 ДТП этилгенди, алада 6 адам ёлгенди (былтыр – 3), 37-лен а жаралы болгъандыла (былтыр – 33).

- Жер-жерли даражалы жоллада аварияланы санын эмда алада ачыгъанланы азайтыргъа къолдан келгенди. Аны бла бирге малланы басдыргъан кезиулени саны 200 процентге ёсгенди. Былтырны бу кезиуюнде быллай бир авария да болмагъан эсе, быйылны эки айында уа экиси  этилгенди. Алада тёрт адам жаралы болгъандыла. Асламында быллай аварияла машинала бютюнда кёп жюрюген жоллада тюбейдиле – Черек эм Басхан районлада, «Урвань-Уштулу» эм «Прохладна-Басхан-Элбрус» федерал жоллада,-дегендиле къырал автоинспекциядан.

Право низамны сакълаучула бардыргъан тинтиуледен ачыкъланнганыча, 18 жылдан 25 жылгъа дери жыл санда водительлени хатасындан 14 авария этилгенди. Алада 8 адам ёлгенди, 22 тюрлю-тюрлю жарала алгъандыла. Алай бла ДТП-ланы 16,3 процентин жаш водительле этгендиле. 

Жылны аллындан бери озгъан эки айны ичинде аварияланы 15,1 проценти 60 жылдан тамата водительлени хатасындан болгъандыла: 13 аварияда 5 адам ёлгенди, 16 жарала алгъандыла.  
ДТП-лада ёлгенлени орталыкъ жыл саны 43 жылгъа жетеди, аланы арасында 21-жыллыкъ жаш адамла, 75-жыллыкъ таматала да бардыла.  
Жылны аллы ма быллай жарсыулу болгъанды, ол себепден жолда жюрюуге къатышханлагъа барысына да сакъ, тёзюмлю болургъа, бир бирге хурмет этерге, жол берирге чакъырабыз.