Сабийлеге, сакъатлагъа да тап болурча

Арт заманда Къабарты-Малкъарда солургъа сюйгенлени санына танг къошулгъанды.  Къыш, жай деп къарамай, къонакъланы иги кесеги  Элбрусха барыргъа итинедиле. Адамланы кёплюгю бла  излемлери да тюрлене барады. Сёз ючюн,  бусагъатда тынгылы солур ючюн кёбюрек   тёлерге сюйгенле да аз тюйюлдюле.  Аны бла байламлы келир заманда Элбрус миллет паркда тёрт жулдузлу къонакъ юйлери бла  кёп функциялы комплекс ишлерге мурат этиледи.  Кёп болмай Россейни баш къырал экспертизасы проектни къабыл кёргенди.

Комплекс беш, алты къатлы мекямладан къураллыкъды. Аны «стандарт», «джуниор сьют» эм «люкс» дегенча 600 номери боллукъду. Алай бла, мында бир жолгъа мингден артыкъ адамны сыйындырыргъа жарарыкъды. 

 Проектге кёре, аны кесини  ресторанлары, жыйылыула, байрамла ётдюрген, компьютерле орналгъан, мастер-классла бардыргъан заллары, сатыу-алыу офислери, тюкенлери, спа-салонлары,  сабийле заманларын зауукълу ётдюрюрча арасы эм башха жамауат жерле да боллукъдула.

 Саулукълары бла байламлы чекленнген онглары болгъанла бла сакъатла къыйналмазча да мадар этилликди. Ол санда  къол-бет жуугъан жерлеринде арбачыкълары бла эркин  бурулаллыкъдыла, тийишли  жерледе  поручняла да жарашдырыллыкъдыла. Сакъатланы ашыргъанла бир отоуда,  кеслери энчи жашарча да  мадар этилликди.