Жамауат жерлени тапландырыугъа – аслам эс

Жууукъ заманда «Жашау этерге инфраструктура» миллет проектге кёре, Нальчикде, Майскийде эм Чегемде  жамауат жерлени игилендириу жаны бла ишле башланырыкъдыла. Аланы проектлери былтыр иги шахар  болум къурау жаны бла битеуроссей конкурсда хорлагъандыла.

Алай бла, Майскийде Энгельс атлы орамда эки гектар чакълы бирде «Заря» деген парк къураллыкъды. Аны проекти шахарчыланы тири къошумчулукълары бла жарашдырылгъанды. Мында баш жер Россейни Жигитлерини аллеясына берилликди. Андан сора да, сабийле ойнарча, спорт бла кюреширча майданла, ашаучу жер, шинтикле, чыракълы чыпынла, кир-кипчик атарча орунла эм машинала сюелирча жер да боллукъду.
Бу жол Майский даражалы конкурсда экинчи кере хорлагъанлыкъгъа, Чегем шахар а биринчи жерге тёрт кере тийишли болгъанды.  Жууукъ заманда мында да 2,5 гектарда «Шахар жибермейди» деген уллу проект тамамланырыкъды. Ол Нальчикни жанындан келе туруп шахаргъа кирген жерде жангы микрорайонда ишленирикди. Аны къурамы тауланы, череклени, шахар тийрени, миллет мотивлени да бирикдирликди. 

Мында бульвар, гитче кёлчюгю бла  солуучу жер, сабийле ойнарча, спорт бла кюреширча майданла да жарашдырыллыкъдыла. Тёгерек-башны жашиллендирирча да мадар этилликди - терекле, юлкюле эм гюлле да орнатыллыкъдыла.   Аны себепли  тийреде жашагъанла  заманларын зауукълу ётдюрюрге, спорт бла да кюреширге да онг табарыкъдыла. 

Нальчикде уа 2-чи Таман дивизия атлы орамда Буз къаланы къатында  жаш тёлюге деп 1,5 гектарда экстрим-парк къураллыкъды. Аны юсюнден   Нальчик сууну жагъасында сабий-жаш тёлю спорт кластер проектни бардыргъан кезиуде окъуна айтылгъан эди.

Биринчи кезиуде мында «памп-трек», «скейт-парк», «скейт-бол» эм сабийле ойнаучу майдан да къураллыкъды. Планнга кёре,  администрацияны юйю, ачыкъ башлы амфитеатр, солуучу эм машинала сюелирча жерле да къураллыкъдыла.

Саулай алып айтханда, келир заманда республикада 35 жамауат жер ишленирикди неда жангыртыллыкъды.
Эсге сала айтсакъ, быйыл 26 мартда шахарла бла районланы игилендирирча тёрели  битеуроссей къол кётюрюу башланады. Анга кёре,  Къырал жумушланы тамамлагъан бир порталда хар ким кесини оюмун билдираллыкъды. Жамауат сайлагъан жерлеге энчи комиссия къарагъандан сора, айырмалыланы конкурсха  къатышыргъа эркин этерикди.  Ол 21 апрельден башлап 12 июньга дери барлыкъды.