Аурууну заманында бакъмаса, ол къыйыннга кетерикди

Россейни Саулукъ сакълау министерствосу 9-15 мартда  жукъгъан гепатит С аурууну жайылыууна къажау ыйыкъны бардыргъанды.  Аны чеклеринде КъМР-ни Саулукъ сакълау министерствосуну штатдан тышында баш специалисит-наркологу, Психиатрияны бла наркологияны клиника арасыны баш врачыны орунбасары Резуан Бетуганов наркоманланы арасында С гепатит жукъгъанла бютюнда аслам нек болгъанларын ангылатады:

-   Гепатит С жукъгъан аурууду, ол къыйынладан бириди.  Наркотиклени ичгенле уа аны бла башхаладан аслам ауруйдула. Аны бир ненча сылтауу барды. Биринчиден,  ууну ичгенлери ючюн аланы иммунитетлери бузулупду. Дагъыда асламында ала таза болмагъан шприцни хайырланыргъа, аны бир бирине берирге да боладыла,- дейди нарколог.

 Аурууну заманында бакъмаса, ол къыйыннга кетерге, ол санда бауурда онкология башланыргъа боллукъду. «Башында айтханымча, наркоманны иммунитети бузулгъаны ючюн гепатит С санларына бютюнда уллу заран салады. Алай, жарсыугъа, ала ауруу жукъгъанын билселе да, аны заманында бакъмайдыла»,-дейди Резуан Бетуганов.