Не ишде да сакълыкъны хатасы жокъду

Арт заманлада жаш тёлюню арасында дропперство деген зат аслам халда тюбейди деп билдиргендиле Россейни Следствие комитетинден. Дроппер деп, законсуз амалла бла этилген ахчаны бир счётдан башхасына ётдюрюрге себеплик этген адамгъа айтадыла. Аллай ахча кибер хыйлалыкъла, наркотиклени сатыу эм башха аманлыкъла бла этиледиле.

«Аманлыкъчыла жаш адамла кимге да терк ийнаннганларын хайырланадыла. Жаш тёлюге женгил амалла бла: банкоматдан ахчаны алып, аны башха терминал бла счётха ётдюрюп неда ахчаны бир белгили адамгъа тутдуруп, кесигизге файда тюшюрлюксюз деп ийнандырадыла. Андан тышында да, аманлыкъчыла жаш адамлагъа кеслерине банк карталаны жарашдыртып, аланы сатып аладыла. Аллай карталаны аманлыкъ ишледе хайырлансала, аны иеси уголовный жууапха тартыллыкъды», - деп билдиргендиле Россейни Следствие комитетини пресс-службасындан.

Аллай аманлыкъ ишлеге жаш адамланы чатланы, мессенджерлени эм социальный сетьлени юслери бла къошадыла. Аманлыкъ ишге бир кере къатышханны уа ата-ананга, низам сакълаучу органлагъа билдирликбиз деп къоркъутадыла эм башха аманлыкъ ишлеге къатышдырадыла.

Арт заманлада къайгъы этдирген дагъыда бир зат барды: жаш адамланы sim-бокслада административ жумушлагъа къошаргъа кюрешедиле. Белгисиз кураторла бир-бир электрон техникада sim-карталаны алышындырсагъыз ахча аллыкъсыз деп алдайдыла. Ол аманлыкъчылагъа россейли абонент номерлени кеслерини законсуз ишлеринде хайырланыргъа онг береди.

Озгъан жылда Россейни Уголовный кодексине, башда айтылгъан аманлыкъла бла байламлы жангы статьяла кийирилгендиле. Аллай аманлыкъ ишлеге къатышханла алты жылгъа дери олтурургъа боллукъдула.