Багъыр дарманланы бахчада хайырланыуну юсюнден

Багъыр купорос жемиш эмда наныкъ тереклени бла юлкюлени аурууланы (жууалы инфекцияланы) асламысындан иги къоруулагъанын терек бахчалары болгъанланы кёбюсю уста биледиле. Быллай препарат алмада, кертмеде, айвада парша деген аурууну болдурмазда да бек хайырлыды, дейдиле Россельхоз араны Къабарты-Малкъарда бёлюмюню специалистлери.

Бу дарман шапталда, эрикде, баллиде коккомикоз, монилиоз аурууланы, заранлы жууаланы да къурутады, юслери тамгъалы болмазча этеди. Наныкъла дегенде уа, купоросну дугъумда бла юртюнде хайырланыргъа жарайды, башхаларында уа- угъай.

Гокка ханслагъа да барды аны хайыры; ол аланы тамгъаладан бла ун маталлы чыкъдан сакълайды.

Багъыр купоросну жаз башыны ал кезиуюнде хайырланыргъа керекди, терекле чагъып башлагъынчы дери. Аны бегирекда жанына ёсген бутакъла терекни тёммегинден чыкъгъан жерлеге чачаргъа тийишлиди. Бу препаратны хазырлай кёп тутаргъа, башха пестицидле бла къатыш этерге да жарамайды. Аны асламысында тытыргъа къошуп алай хайырланыучудула. Аллай затны аты – бордос сууду. Ол кеси да эки тюрлю болуучуду: 1 эм 3- процентлик.

Биринчисин жаз башында хайырланадыла, ол терекни чапыракъларын кюйдюрмезча. Кючлюрегин а - кюзде.

Быллай сууда битимлеге магъаналы кальций барды. Бир терекге, аны сортуна эмда ёсюмюне кёре, андан 2-10 литр къоратылады. Кесин да танг эрттен неда ингирде жарайды чачаргъа. Бир амал бар эсе, пестицидлени орунуна ма быллай бордос сууну хайырланыгъыз – ол аладан къайда къоркъуусузлуду.

Болсада тийишли жорукъланы уа унутмагъыз:

- хайырланыу низамдан чыкъмагъыз;

- энчи юс кийимле эмда резин къолкъапла кийигиз, бетигизни маска бла жабыгъыз, респираторну  хайырланыгъыз;

- бордос суу теригизге неда ауузгъа тюшсе, олсагъат суу бла жууугъуз;

- айтылгъаныча, аны эрттенликде неда ингирде хайырланыгъыз, кесин да аяз этмеген сагъатлада;

- препаратны сабийле, жаныуарла да жеталмазлыкъ жерледе тутугъуз.