Журналистикагъа жашауун жоралагъанды

КъМР-ни Сыйлы журналисти, телевиденияны бла радиону айырмалы ишчиси, КъМР-ни Комсомолуну саугъасыны лауреаты Гочияланы Сагид Халидовични аты Къабарты-Малкъар Республиканы асламлы информация органларыны айныуу бла айырылмазлыкъ байламлыкъдады. Аны урунуу жолу журналист ишге берилиуню эмда туугъан республикагъа къуллукъ этиуню ачыкъ юлгюсюдю. КъМР-ни Архив службасы Гочияланы Сагидни 85-жыллыгъына жоралап чыгъаргъан материалды бу.

Сагид Халидовични журналистикагъа этген къошумчулугъун артыкъ багъаларгъа къыйынды. Кёп жылланы ичинде ол республикада басманы айнытыуну жолунда уруннганды, информациялы болумну къураугъа уллу къошумчулукъ этгенди. Аны материаллары терен тинтиуле, шартланы тюзлюгю эмда ачыкъ публицистика жорукъ бла танылгъандыла.

Аны фахмусуна ишлеп башлагъан ал жылларында окъуна багъа берилгенди. Жаш тёлю телепередачалары ючюн Къабарты-Малкъарны комсомолуну премиясына тийишли болгъанды. Ол а аны регионда журналистиканы айнытыугъа этген уллу къошумчулугъуну шарт белгисиди.

Гочия улуну журналистика усталыкъда урунуу жолу телевиденияда башланнганды. Ол анда кесин художестволу бериулени хунерли редакторуча кёргюзтгенди. Аны чыгъармачылыкъ ишинде жаш тёлюге жораланнган бериулери энчи жерни алгъандыла. Ала къуру билдириу бла къалмай, ёсе келген тёлюню тюз жашау этиуге юйретип, дуниягъа къарамларын да къурай эдиле.

Къараучуланы эслеринде аны быллай бериулери къалгъандыла: «Алло, мы ищем таланты!», «Поют ручьи», «Пластинка дружбы», «Дружба всего дороже», Къулийланы Къайсынны 60-жыллыгъына аталгъан «Мир дому твоему, Къайсын». Композитор Аслан Дауровну чыгъармачылыкъ жолуну юсюнден чыкъгъан «Несите нежность на ладонях» дегеннге да бийик багъа берилгенди. Аланы эм кёп башха бериулени автору, режиссёру, бардырыучусу да Гочияланы Сагид кеси болгъанды.

Асламлы информация средстволаны айнытыугъа салгъан къыйыны ючюн Сагид Халидович «Къабарты-Малкъар Республиканы Сыйлы журналисти» атха тийишли болгъанды. Ол а тутхан ишине кертичиликни, кёп жылланы уруннганына бийик багъа берилгенини белгисиди.

Журналист кесини чыгъармачылыкъ ишинде халкъланы арасында келишиулюкню кючлеуге эмда республикада жашагъан миллетлени араларында культура байламлыкъланы айнытыугъа уллу эс бургъанды. Кесини материалларында ол окъуучулагъа бирлик, шуёхлукъ, бир-бирге билеклик этиу сезимлени жетдирирге кюреше эди. Сагид Халидович тюшюрген «Горы в черном башлыке» документли фильмде къарачай халкъ кёчюрюлгенини юсюнден айтылады. СССР-ни Культура министерствосу дурус кёрюп, бу теманы кётюрген биринчи фильм ма ол эди. Аны бюгюнлюкде Россейде, тыш къыраллада да кёргюзтедиле.

Кесини чыгъармачылыкъ жолунда Сагид Халидович журналистиканы жорукъларына кертичилей къалгъанды. Кёп жылла озгъанлыкъгъа, аны материаллары бюгюнлюкде да магъаналыдыла. Аны сынамы эмда усталыгъы республикада кёп журналист тёлюге юлгюдю.