Къыш чархланы тешерге ашыкъмагъыз

Жаз башы келгени бла улоудан къыш чархланы тешип, аны жай тюрлюлерин орнатыу жумуш чыгъады. Бирле аны къар эрип, орамла таза болгъанлай этерге ашыгъадыла, алай ол а тюз оноу тюйюлдю. Къайсы ишдеча, мында да кесини жорукълары бардыла – бу материалда аланы юсюнден айтайыкъ. Аны жоллагъа къарагъан «Кавказ» управленияны специалистлери хазырлагъандыла.

Чархланы алышыуну оноуун орузламагъа къарап угъай, кюнню халин, хауаны жылыулугъун да эсге алып этерге тийишлиди. Январьда неда февральда кюнлени бирлери иги да жылыракъ болгъанларына алданыргъа жарамайды. Алай март келип, хауа да жылы болуп тебирегенде уа аны сагъышын этер заманы келеди.

Баш жорукъ мында буду – хауаны жылылыгъы. Ол,  эм азындан,  беш кюнню ичинде 5-7 градусдан тюшмей турургъа керекди. Биз жаланда кюндюзгю болумну юсюнден угъай, сау сутканы ичинде орта температураны юсюнден айтабыз! Жай чархланы жаланда жылыда хайырланыргъа жарайды, ол биз сагъыннган чекден озгъандан сора. Ары дери уа, аны резини къаты болады. Аны ючюн а жолну да осал тутарыкъды.

Къыш чархла уа сууукълада хайырланырча этиледиле. Аланы машинада жайгъа да къойсагъыз, бек терк тауусулуп кетерикдиле. Аны къой, улоу жолну осал тутарыкъды, аны тыйгъан да къыйыныракъ боллукъду. Ол затланы ангылап, къыш чархланы жайда хайырланыугъа закон бла чек салыннганды.

Чархланы кесигиз да алышыргъа боллукъсуз, алай игиси уа – шиномонтажгъа барсагъыз. Анда аланы хар нелерине да къарап, керек болса, тап этип алай орнатырыкъдыла жерлерине.