«Къыралыбызны ышаннгылы къалкъаны болуп келеди»

Терроризмге къажау миллет комитет къуралгъанлы 20 жыл толгъанды. Аны бла байламлы КъМР-ни Башчысы Казбек Коков  Терроризмге къажау миллет комитетни (НАК) башчыларын, анда къуллукъ этгенлени барысын да байрамлары бла алгъышлагъанды.

«Анча заманны ичинде НАК Россей Федерацияда терроризмге къажау кюрешде баш магъананы тутхан, терроризмге къажау кюрешни бардырыугъа къатышхан къырал эмда жамауат къурамланы ведомствола аралы бирге ишлеулерин къурагъан эмда аланы ишлерин бирге тийишдирген баш орган болуп келеди.

Озгъан жылланы ичинде миллет комитет бек кёп иш тындыргъанды, терроризмге бла экстремизмге къажау кюреш къыйматлы болуруна бир да болмагъанча уллу къыйын салгъанды, къыралыбызны ышаннгылы къалкъаны болуп турады.

Анда къуллукъ этгенлени усталыкъларыны бла хунерликлерини хайырындан Россейге эмда аны инсанларына къажау кёп къоркъуулу аманлыкъланы жолларын кесерге къолдан келгенди. Анга уа бу шартла шагъатлыкъ этедиле: жюзле бла саналгъан террорчулукъ ишлени алгъадан тохтатылгъанлары, мингле бла инсанланы ёлюмден къутхарылгъанлары.

Бюгюнлюкде энчи аскер операция бара тургъанда, НАК украинлы миллетчи къауумла къурагъан диверсияланы бла терактланы болдурмау жаны бла ишни къыстау бардырады, къыралда къоркъуусузлукъну эмда ырахатлыкъны жалчытыу жаны бла къыйын борчланы тамамлайды.

Айхай да, НАК-ны регионлада терроризмге къажау комиссияланы ишлерин къураугъа салгъан къыйыны да чексиз уллу болгъанын белгилерчады. Аны алагъа сёз бла, иш бла да этген болушлугъуну магъанасы айтып-айтмазча уллуду. Аны ючюн анга жюрек ыразылыгъымы билдирирге, уллу ыспас да этерге сюеме.

Терроризмге къажау миллет комитетни башчыларын, анда къуллукъ этгенлени барысын да байрам бла къызыу алгъышлайма, кийик саулукъ, жюрек ырахатлыкъ, Ата журтубузгъа къуллукъ этиулеринде жангы жетишимле тежейме!» - деп айтылады КъМР-ни Башчысыны МАХ платформада энчи каналында басмаланнган алгъышлау сёзюнде.