Бир белгини тарыхы

...1994 жыл. Миллетибиз туугъан жеринден зор бла кёчюрюлгенли 50 жыл толгъан чакъ. Ол кюннге атап, белгили архитектор Гюзюйланы Заубатырны жашы Малик ма бу сиз кёрген белгини суратлайды. 

Элия ургъан беш уллу бутакълы терек кюйсюз оноучула къыйынлыкъгъа батдыргъан Беш да Тау элни белгисиди. Элия аны тамырына жууукъ урупду. Алай бла автор 1944 жылда, халкъыбызны кёчюргенден тышында, гунч этер акъыл болгъанын ачыкълайды. 

Бу белги мени эсимде школ замандан бери къалгъанды. Биз тамата класслада окъугъан жыллада халкъыбызны сюргюнде ётдюрген жылларыны белгисича жюрютюлгенди. Андан сора 2000 жыллада жетген тёлюледе тарых, халкъны жашауу бла сейирсиннгенле аз эдиле. Белгиге да артыкъ уллу эс бёлюнмегенди. Алай, мен оюм этгенден, ол болмагъанча аламат ачыкълайды миллетни 13-жыллыкъ бушуулу къадарын. Аны адамла жыл сайын 8 мартда кёчгюнчюлюкде ёлген адамларыбызны хурметине ишленнген мемориалгъа тебирегенлеринде, ёшюнлерине тюйрерча этип, жаяргъа керекди деп, алай сунама.    

Ол мемориалыны автору да Гюзю улуду. Бу комплексни къурауну юсюнден оноу 1989 жылда этилип, 8 мартда аны биринчи ташы салыннган эди. Архитектура проектин жарашдырыргъа уа Малик Заубатыровичге буюрулады. Автор аны орта азиялы маданиятны бла кеси халкъыбызда эрттеден жюрюген къурулуш  амалларын бирикдирип хазырлагъанды. Объектни къурулушу саулайда 2002 жылда бошалгъанды. 

Газетибизде жууукъ заманда бизни Гюзю улу бла башда айтылгъан затланы юслеринден ушагъыбыз басмаланырыкъды. 

Суратны Мамайланы Алий алгъанды.