Къабарты-Малкъар Республиканы Башчысы К.В.Коковну республиканы жамауатына чакъырыу сёзю

Къабарты-Малкъар Республиканы Башчысы К.В.Коковну  республиканы жамауатына 
чакъырыу сёзю

Багъалы жерлешлерим!

Бизни бушуулу кюнден – 1944 жылны 8 мартындан – 82 жыл айырады. Ма ол кюн терслиги болмагъан малкъар халкъ законсуз Орта Азиягъа бла Къазахстаннга кёчюрюлгенди. Андан бери не къадар кёп заман озса да, ол ачыуну жарасы жюреклерибизде сынтыл болмай сакъланады. Биз бек уллу зорлукъну бла зарауатлыкъны хатасындан ёлгенлени бла азап чекгенлени эсибизде тутабыз, киши жеринде жууукъларын бла ахлуларын тас этген хар юйюр бла бирге бушуу этебиз. 

 Не уллу къыйынлыкъла сынаргъа тюшген эсе да малкъар халкъгъа, ол чыдаялгъанды, бюгюлмегенди, ниет чыныгъыулугъун тас этмегенди. Жигерлиги бла жигитлиги, ауур акъыллылыгъы бла иш кёллюлюгю болушхандыла анга сау къалыргъа, аны къой – кесини таза ниетлилигин, адеплилигин, тилин, маданиятын, адет-тёрелерин, учунуулугъун  тас этмезге, бизни барыбызны да бир юйюбюзге къайтып, жашауун къураргъа да.

Бюгюнлюкде малкъар халкъ Къабарты-Малкъарны кёп миллетли бирикген юйюрюнде алгъа таукел атлайды, республикабызны, саулай къыралыбызны да экономика, социал эмда маданият жаны бла айныуларына, ырахат жашау этиулерине бла жашнауларына уллу къошумчулукъ этеди. Бирлигибизни, бирлешиуюбюзню да  кючлей барсакъ, не уллу къыйынлыкъланы да хорлап, туугъан Къабарты-Малкъарыбызны бла Ата журтубузну келир заманлары къолайлы болур ючюн салыннган борчланы толтурургъа къолубуздан келмей къаллыкъ тюйюлдю.