Биринчи жерге тийишли болгъандыла

Къобанны къырал университетинде «Архитектураны кюнлери» Халкъла аралы фестивальны чеклеринде тюбешиу къуралгъанды. Анга уа КъМКъУ-ну архитектура, къурулуш эмда дизайн институтунда билим алгъанла да къатышхандыла. Аны бла да къалмай, аланы хазырлагъан проектлери архитектура жаны бла эришиуде биринчи жерге тийишли болгъанды.

Эришиуге Россейни бийик билим берген окъуу юйлеринден эм ахшылагъа саналгъан  онбир къауум къатышханды. Конкурсха къошулгъанлагъа 72 сагъатны ичинде Ростов шосседеги Офицер терек бахчачыкъны тапландырыу эмда игилендириу жаны бла жыйымдыкъ проектни жарашдырыргъа керек эди. Марда бла белгиленнген заманны  ичинде, проектни башлардан алгъа тинтиуден тебиреп, презентацияны къураугъа дери ишни сыйындырыргъа борч салыннганды.

Студентле  къыйыннга саналгъан тийре бла ишлегендиле: ханс басып, къаралмай тургъан терек бахчачыкъ темир жолну къатында болгъанындан сора да, бу тийре асыры дауурлуду. Андан тышында да, аны Екатеринодарны азатлагъанлагъа жораланнган эсгертмени  эмда жамауатны жюрютген улоула тохтагъан жерлени былайгъа  узакълыкъларын неда жууукълукъларын эсге алыргъа керек эди.

- Краснодаргъа биринчи кере келип, биз мындагъы трамвайгъа сейир этгенбиз, энди анга 125 жыл толгъанды. Проект бла байламлы оюмубузну, кёз къарамыбызны мурдору да ол болгъанды,-дегенди хорлагъан студентледен бири Дарина Хежева.

Алай бла, жаш адамла бу тийрени аскер тарыхын бла жамауат хайырланнган инфраструктурасын бирге байларыкъ оюмларын билдиргендиле. Эсгертмени къатында Къобан черекни айланчларын, бурулгъан жерлерин къатлагъан суу орунну проектин жарашдыргъандыла. Эки жанында да терекле орнатылгъан баш жолну узунлугъуна, башха-башха юлгюлю трамвайладан тогъузусун сыйындырып, аланы уа кафелеге неда кворкинг-тийрелеге айландыргъандыла. Энчи эсни уа бери ким сюйсе да келип солургъа боллугъуна бургъандыла.

Проектни къурай, студентлени бирлери 3Д-модельлени жарашдырыу бла, бирсилери уа презентацияны хазырлау бла кюрешгендиле. Аны къоруулагъан кезиулеринде уа жюрини келечилери окъуна проектни суратха алдырып, кёп тюрлю соруула бергендиле. Жашланы бла къызланы чыгъармачылыкъ жаны бла кёз къарамларыны сейирлигин да чертип, аланы ишлерин бийик даражагъа тийишли кёргендиле.

Андан тышында да, тюбешиуню кезиуюнде жыл сайын да бардырылыучу къарау-эришиу къуралгъан эди. Анда уа эм ахшы архитектуралы чыгъарманы ачыкълагъандыла. Аны баш мураты да жаш архитекторланы, дизайнерлени, къурулушчуланы эмда сурат ишлегенлени баямлау  бла бирге,  алагъа тутхучлулукъ этиудю эмда хунерлерин айнытыуду. КъМКъУ-ну сагъынылгъан институтунда окъугъанла да,  усталыкъ жаны бла хазырлыкъларыны даражасын кёргюзтюп, белгиленнгенича, къауумланы эсеплеринде биринчиле болгъандыла эмда саугъаланнган да этгендиле.

Алайды да, «Ротонда» атлы проекти бла гитче курслада билим алгъанланы арасында Къулийланы Лима айырмалы болуп, «кюмюш» бла белгиленнгенди. Тамата курслада окъугъанланы санында биринчи жерни Аскер Танашев бла Аскер Тутов юлешгендиле.

Жаш адамланы эришиуге хазырлагъанла уа архитектура эм дизайн кафедраны преподавательлеридиле. Атабийланы Фатимат да бу жумушха юлюш къошханладан бириди.