Озгъан заманла бла ушакъ

Быйыл  белгили жазыучу, журналист, кинорежиссер, жамауат къуллукъчу, РФ-ни эмда КъМР-ни культурасыны сыйлы къуллукъчусу Владимир Вороковну 90-жыллыгъын белгилеу бла байламлы  бир къауум ишле бардырыллыкъдыла. Аладан бири уа озгъан орта кюн устаны атын жюрютген  Къабарты-Малкъарны Маданият фондунда болгъанды.

Фондну уллу залында жарыкъ эмда башха заманладача болмай, жылыулу эди. Ол кюн ары Владимир Вороковну энчи таныгъанла, кёп жылланы биргесине ишлегенле келгендиле. Алагъа аны аты искусствону тарыхында тизгинлеге кириу бла чекленип къалмай, эсгериулени байламлыгъыды.

Тюбешиуню Владимир Вороковну атын жюрютген фонд, КъМР-ни Кинематографистлерини союзу эмда  Шимал  Кавказда искусстволаны къырал институту бирге  къурап бардыргъандыла.

Тюбешиуню ача, Фондну председатели Люаза Макоева чертип айтханнга кёре, бюгюн бери Владимир Халидовични танымагъан, билмеген адам келмегенди. Бери келгенле бары да устаны алыкъа да унутулмагъан ауазын жангыдан эшитирге, аны бла къалай танышханларыны, чыгъармачылыгъыны юсюнден, кесини эсгериулерин айтыргъа да ыразыдыла.

Залда олтургъанлагъа  энчи саугъаны уа Лёля Бекешева этгенди. Ол  Владимир Вороковну жашаууна, чыгъармачылыкъ жолуна жораланнган «Кавказны юсюнден айтханла» деген бериуюн келтирип кёргюзтгенди. Автор аны онюч жыл мындан алгъа алгъанды. Залда олтургъанланы барына да аны жангыдан саулай, тирилей, дуния бла бир жангычылыгъы, чыгъармачылыкъ ишге итиниуюн кёрген бек хычыуун эди.

Бериуге къарап бошагъандан сора уа,  Владимир Халидовични таныгъанла аны юсюнден кеслерини эсгериулерин айтхандыла. СКГИИ-де  режиссура кафедраны  башчысы Мухамед Черкесов уста бла бирге ишлеген кёп жылланы юсюнден хапарлагъанды. Аланы чынтты къарындаш чыгъармачылыкъ байламлы эте эди. Кинематографистлени союзуну председатели Басир Шибзухов а жаш заманында Владимир Вороков бла аны юй бйчеси режиссёр Рина Мартирсова фахмулулугъун кёрюп, бек алгъа кинода ойнаргъа, ызы бла уа НОТР телекомпанияда  «Роза бла капитан» деген бериуню бардырыргъа чакъыргъанларын эсгергенди.

Залда олтургъанла Ботталаны Муратны, Руслан Хагазитовну эмда кёп башхаланы аны юсюнден  айтхан хапарларына уллу эс буруп тынгылагъандыла. Барына да заманында Владимир Халидович жашауларында, ишлеринде да искусствогъа  жол кёргюзтген адам болгъанды.

-Маданият фондда,  къаллай да болсун,  бир иш бардырылгъанда,  мен ары барып, ол кёрсе, къатыма келип: «ишчи чибинчик» деучюсюн бир заманда да унутмайма. Бир жол а Пятигорск шахарда Шимал Кавказны республикаларында ишлеген журналистлени жыйылыуу болады. Ишни юсю бла манга да ары барыргъа тюшеди. Жыйылыу бошалгъандан сора саугъалаула болургъа керек эдиле. Журналистлени барын  да омакъ, уллу рестораннга чакъырадыла. Саугъалау да анда болады. Тюбешиу башланнганда, анда Россейде атлары кенг белгили кёп тележурналистле,  РФ-ни Къырал Думаны депутатлары, Ставрополь крайны башчысы, дагъыда башха сыйлы къонакъла да олтурадыла. Бизни столубуз сахнагъа жууугъуракъ, алай бир къыйырыракъда эди. Коллегаларым бла олтуруп, хапар айтабыз. Бир заманда ингирни бардыргъан мени тукъумуму, атымы айтады. Мен ишни болумун ангыламай, олтурама. Ол дагъыда къайтарады атымы. Сора туруп, сахнагъа чыгъама. Ма ол заманда манга алгъан суратларым ючюн  Шимал Кавказда экинчи жерге чыкъгъанымы белгилеп, кубокну, дипломну эм ноутбукну да саугъа этедиле. Мен а артда ангылагъан эдим, саугъагъа мени Владимир Халидович кёргюзтгенин. Ол эм ахшы материалланы, суратланы сайлагъан саугъалагъа тийишли кёрген комиссияны санына кире эди. Сёзсюз, мен да, эсимде кёп жыллагъа къалгъан ол иш бла байламлы эсгериуюмю айтхан эдим.

Али Шогенцуков атлы къабарты драма  театрны артисткасы  Марина  Мисостишхова уа, аны Аллахдан келген фахмусун эсге тюшюре,  былай дегенди: «Владимир Вороковну чыгъармаларыны юсю бла аны аламат лирикалы къылыгъын ангыларгъа боллукъду». Ол айтханнга кёре, аны жюрегини жарыгъы «Акъылымда болгъанны туура эте» деген эссесинде туура кёрюнюп турады. Анда авторну хар сёзю да сюймекликге эм ариулукъгъа бойсунупдула.

Тюбешиуню ахырында  Люаза Макоева сёлешгенди. Председатель  айтханнга кёре: «Владимир Халидович арабыздан кетгенли беш жыл ётгенди, болсада биз аны унутмагъанбыз, ол бизни барыбызны да жюрегибизде жашайды. Ол башлагъан иш Маданият фондда андан ары «къайнайды» деп таукел айтыргъа боллукъма. Арадан хазна кюн озмайды къаллай да болсун бир иш бардырылмагъан. Алай бла фестивальла, конкурсла,  тёгерек столла, кёрмючле, тюбешиуле, оюнла къураладыла. Фонд,  аны заманындача,   миллет -культура арала бла бирге ишлейди, аланы келечилери бюгюн да арабызда олтурадыла. «Хроника Кабардино-Балкарии» деген проектни чеклеринде биз дагъыда бир кере НОТР телекомпанияда ол алгъан, къурагъан хазнагъа- фильмлеге къараргъа, озгъан заманланы эсибизге тюшюрюрге онг табабыз. Сёзсюз, ала бизни республикабызны тарыхыны, жашаууну, адамларыны юсюнден хапарлагъан  бек багъалы документли киноладыла.