Былтыр ишле аман бармагъандыла

Озгъан шабат кюн КъМР-ни Жарыкъландырыу эм илму министерствосу кесини кезиулю жыйылыуун Черек районда бардыргъанды. Аны ишине район  администрацияны башчысы Къулбайланы Алан да къатышханды. Жыйылыуда 2025 жылда бардырылгъан  къырал аттестацияны эмда тинтиу ишлени битеуроссей эсеплерин чыгъаргъандыла.

Жыйылыуну ача, КъМР-ни жарыкъландырыу эм илму министри Анзор Езаов сёз нени юсюнден барлыгъын эмда къаллай соруула сюзюллюклерин белгилегенди. Ишчи тюбешиуге  башха министерстволаны келечилери, Черек районну администрациясында ишлегенле эмда битеулю билим берген мектеплени директорлары да къатышхандыла.

«Биз  2025  жылда болгъан къырал  аттестацияны эсеплерин тынгылы сюзгенбиз.Ол а бизге  2026 жылда айныуну жолун кёргюзтгенди. Озгъан  жыл «Жаш тёлю эм сабийле», «Юйюр» дегенле жангы миллет проектле бла айырмалы эдиле. Ол жылда тёрт мектепге капитал ремонт этилгенди, алай бла окъуучулагъа тынгылы болумла къуралгъандыла. Быйыл  дагъыда эки окъуу юйге ремонт этерге деген план барды. Бизни муратыбыз – районда болгъан битеу мектеплени  тап халгъа  келтириу бла  чекленип къалмай, тийишли техника бла да жалчытылынырча этергеди. Бизни сабийлерибиз билимни шёндюгю заманны излемине кёре ишленнген школлада окъургъа  керекдиле. Дагъыда айтырыгъым, жаланда сабийле окъуугъа  эс буру у бла  чекленип къалмай, устазла да билимлерин дайым ёсдюре, айный, жангычылыкъланы биле турургъа борчлудула.

Алда кёп ишле бардыла, аланы барын да тамамлар ючюн,  керекли жумушланы белгилеп, ишни эбин билсек, этген муратларыбызгъа  бир тюрлю чырмаусуз жетерге  боллукъбуз»,-дегенди министр.