Студентлени депутат бла тюбешиулери

КъМКъУ-да студентлени Къырал Думаны XVIII чакъырылыууну депутаты Виктория Родина бла тюбешиулери болгъанды. Бу жумушха «Молодая Гвардия» биригиуню университетде бёлюмю башламчылыкъ этгенди.

Жыйылыуну ача, университетни проректору Мурат Гукепшоков тёлюлени араларында байламлыкъланы магъанасыны юсюнден эм жаш тёлю къыралны къадары ючюн жууаплы болгъанын айтханды. «Сизни борчугъуз, cиз жашауда жетишимле болдурурча не этилирге кереклисини юсюнден не къадар кёп айтсагъыз, законланы жарашдырыуда башламчылыкъла тынгылы хазырланырыкъдыла», - дегенди Виктория Родина.

Жыйылыуда къыралны тарыхын къоруулауну, юйюрлеге билеклик этиуню, демографияны сюзгендиле. Студентле Виктория Родинагъа аны жашаууну, ишини юсюнден кёп тюрлю соруула бергендиле. Депутат студентле къыралны законларын терен билирге керек болгъанларын ангылатханды.

«Мен жууукъларыма, юйюрюме бек ыразыма. Ала манга саулай жашауумда билеклик этгенлей келедиле. Къатыгъызда аллай адамла болсала, ала сизге жашауда бийик жетишимле болдурургъа болушурукъдула, деп санайма», - дегенди Виктория Родина.

Бу тюбешиуге къатышханла бирге суратха тюшгендиле. Университетни устазлары, студентлери къонакъларына ыразылыкъ сёзлерин айтхандыла. Быллай тюбешиуле жаш тёлюге властьны келечилери бла жолугъуп, алагъа жарсыуларын билдирирге эм жашау халны тюзетирча амалланы бирге излерге болушадыла.