Жангыртылыуланы юсюнден сёлешгендиле

КъМР-ни жарыкъландырыу  эм илму министри Анзор Езаов,  ведомстволу организацияланы келечилери эм министерствону специалистлери бла бирге республиканы районларында кенгешле бардыргъандыла.

Аллай кенгешле Черек бла Лескен районлада ётгендиле. Алагъа районланы администрацияларыны башчылары, билим бериу управленияланы оноучулары, школланы директорлары къатышхандыла. Министерствону келечилери 2025 жылда бардырылгъан ГИА-ны эм ВПР-ни сынауларыны итогларын тынгылы тинтгендиле.

Бу тюбешиуледе «Жаш тёлю бла сабийле» эм «Юйюр» деген миллет проектлени жашауда бардырыуну соруулары сюзюлгендиле. Лескен районда 2026 жылда тёрт школгъа ремонт этилликди, Экинчи Лескен элде шёндюгюлю китапхана ачылгъанды.

Черек районда былтыр тёрт школгъа башдан-аякъ ремонт этилгенден сора, быйыл дагъыда эки школда ремонт ишле бардырыллыкъдыла.

«Бизни баш борчубуз – шёндюгюлю излемлеге келишген, бийик технологиялы школланы республиканы хар элинде ачыуду. Шахарда, элде жашагъанына къарамагъанлай, сабийни тынгылы билим алыргъа онгу болургъа керекди», - дегенди Анзор Езаов.