Бизнесни жашырынлыкъларына тюшюндюре

Кёп болмай, «Иш кёллю Россей» жамауат организацияны Къабарты-Малкъарда бёлюмю къурап, къырал аграр университетде тюбешиу ётгенди. Аны кезиуюнде XVII жаш тёлю бизнес-школну иши бла шагъырейлениу болгъанды. Проектни магъанасы – жаш адамланы предпринимательликни тасхаларына тюшюндюрюрге, бизнес-план хазырларгъа юйретирге эм урунургъа болушургъа.

Тюбешиуде сагъынылгъан жамауат организацияны советини таматасы, маркетолог эм бизнесни айнытыу жаны бла эксперт Гузеланы Индира, бизнес-школну бошап бюгюнлюкде уа «А.Р. и Консалт» ООО-гъа таматалыкъ этген Исай Ханукаев да сёлешгендиле. Исай а жаш тёлю бизнес-школну тренерини орунунда ишлеригин да билдиргенди. 

Жыйылыуда бизнес-школну буруннгу жыл тауусхан, быйылгъы проектни куратору, жетишимли предприниматель, «Иш кёллю Россей» организацияны жаш тёлю бёлюмюню келечиси Залина Блиева да кесини биринчи атламларыны эм бизнесини юсюнден да айтханды. Ол арт жыллада экология жаны бла таза «EcoJem» деген джемле бла вареньяла чыгъарады эмда ишин жетишимли бардырады. 

Быйыл бизнес-школ ишин «Макропус» айнытыу арада бардырлыкъды. Билим бериу бла байламлы бёлюмге «Аутус» жандауурлукъ фондну таматасы Шауаланы Амина башчылыкъ этерикди.

Ол кюн спикерле проектни юсюнден айтхандыла, курслагъа къатышханла ишни юсю бла тюз сёлеше билирге, байламлыкъ къураргъа, бизнес-проектлени бардырыргъа, оноу этерге, къауум адам бирге ишлерге, СКФО-да бла регионда сынамлы предпринимательни бла топ-менеджерлени юлгюлеринде юйренирге эм башха затладан билимлерин ёсдюрюрге онг табарыкъларын да эслерине салгъандыла.

Ахырында «Иш кёллю Россей» жамауат организацияны келечилери студентлени кёп тюрлю сорууларына тынгылы жууапла бергендиле.

Курслагъа къатышыргъа сюйгенле бюгюнлюкде окъуна заявка берирге боллукъдула. Окъуудан бла ишден чырмамаз ючюн, дерсле солуу кюнледе ётерикдиле эм 26 апрельге дери бардырыллыкъдыла. Анга билимлерин эм сынамларын ёсдюрюрге сюйген студентле, выпускникле, ишлерин энди башлагъан эм сынамлы предпринимательле да къатышыргъа боллукъдула.

Эсге сала айтсакъ, къыйматлы проект 2008 жылдан бери бардырылады. Бюгюнлюкде анга беш жюзден аслам адам къатышханды эм эки жюзден артыкъ бизнес-план жашауда бардырылгъанды. Жаш специалистлени танг кесеги къырал ишледе, энчи бизнесде урунургъа онг тапхандыла. Аланы араларында кеслери бир тюрлю иш ачханла да аз тюйюлдюле.