«Насып – ол таза жюрекди, туугъан жеринге сюймекликди»

Жетишимли, жашаугъа ачыкъ кёзден къарагъан жаш адамланы юслеринден дайым жазабыз. Ала бла ёхтемленебиз, хар ахшы атламларына къууанабыз. Ёзденланы Хажибий бла Лейля да аллай юйюр ёсдюргендиле. Аланы юч къызлары барды. Абаданлары Жулдуз Тырныауузну 5-чи гимназиясын алтын майдал бла бошап, Москвада И.М.Сеченов атлы биринчи медицина институтну 3-чю курсунда окъуй турады. Эм гитчелери Фарида да 5-чи номерли гимназияны 10-чу классында окъуйду. Биз а бюгюн аланы ортанчылары Назиляны юсюнден хапарларыкъбыз.

Назиля окъууну бек сюйген сабийчик болуп ёсгенди. Башланнган класслада хар юйреннген жангы затын ол бек багъалай эди. Китапланы кесине шуёх этип, тенг къызчыкъларын да билимни ариу дуниясына чакъыргъанды. Алай эте, орта класслада окъугъанда, кесине жашау жолун жарытырыкъ иш усталыкъ сайларгъа тюшгенинде, къылыгъына кёре анга бек келишген юрист усталыкъ болгъанын ангылап, бар сагъышларын ол жанына бурады. 9-чу классны айырмалы аттестат бла бошагъаны уа, аны кеси кючюне бютюн ышандыра, кёллендире, жаланда алгъа элтеди. Энди ол право бла байламлы дерслени, китапланы бек сюйгени ючюн, бош заманында да аланы окъургъа итинеди. Салгъан кючю аны керти да жетишимге элтип, Назиля школну айырмалы, алтын майдал бла бошайды. Умут этгенича, сайлагъан усталыгъы бла байламлы окъуугъа Москвада О.Е. Кутафин атлы юристле хазырлагъан къырал университетге киргенди. Бусагъатда экинчи курсну бошай турады.

- Хар сессияны да иги берип, алчы болала эсем, мени окъуугъа тюз кёзден къаратхан, билимни сюйдюралгъан устазларыма ыспас этеме. Гимназияны таматасы Моллаланы Фатима Чабиловна хар окъуучусун таныгъан, керекли заманда ала бла ушакъ этген, кеси кючлерине ийнандыргъан тамата болгъаны себепли, устазлары да кесичаладыла. Класс башчым Османланы Олеся Борисовна кёп кере билеклик эте, кесиме ийнандыргъанды. Къырал сынауланы аллында аллай билеклик бек магъаналыды. Тарыхны бла обществознанияны бек сюе эдим. Къалай эсе да тюзлюкге, аны тохташдырыугъа сабийликден итиннгеними айтадыла юйде да. Ол дерследен окъутхан Чочайланы Марина Шакъмановнагъа да ыразылыгъым чексизди. Ол сейирими заманында эслеп, аны андан ары айнытыр амал тапханы ючюн, жашаууму сайлауун тюз этген сунама. Орус тилден окъутхан устазларымы къыйынларын да унуталлыкъ тюйюлме. Аланы болушлукълары бла къырал сынауда бийик балла алгъанма, - дейди Назиля, школ жылларыны юсюнден хапарлай. Сабий анга салыннган къыйынны унутмай, аны татыуун чыгъара, жашауда тюз жол бла барала эсе, къайсы устазгъа да эм уллу саугъа олду.

Назиля школуну бла жашагъан районуну жамауат ишлерине тири къатышханды. Волонтёрлукъ жумушну бардыргъанды. Андан сора да, «Салам» миллет тепсеулени юлгюлю ансамблинде тогъуз жыл тепсегенди.

- Тепсеулеге бла миллет жырларыбызгъа сюймеклигим сабийликден да уллу болгъанды. Анча жылны кеси шахарымда тепсеп, бери келгенимде да унутуп къоялмай, къарачай-малкъар тепсеулеге юйретген студияны табып, мында да тепсейме. КъМР-ни маданиятыны сыйлы ишчиси Будайланы Руслан Ануаровични ариу ызын мында юйретиучюле бек жаратхандыла. Мен анга бла районну маданият жашауун бийикде тутхан эм алда бардыргъан Толгъурланы Жаннет Мисирбиевнагъа жюрегимден ыспас этерге сюеме. Аны адамлагъа сюймеклиги, ишинде жууаплылыгъы манга юлгю болгъандыла, - дейди Назиля.

Юристликни сайлай туруп, таулу къызчыкъ анга ышаннган инсанланы тюзлюклерин тохташдырыргъа, аланы эркинликлерин къорууларгъа сюйгенди. Сюдде ишлерге, адвокат болургъа да андан итинеди. Ишинде жетишимли болса, аны сыйы бийик боллугъун, хакъы да анга кёре ёсеригин биледи. Аны себепли бар эсин бла кёлюн салып окъуйду. Бакалавриатны тёрт жылдан бошап, эки жылны да магистратурада окъургъа дейди. Андан сора аспирантурагъа барыр муратлыды.

- Алгъа адвокат болургъа бек сюе эдим. Энди уа, бу усталыкъны теренирек окъуй баргъаным сайын, юрист болуп бир уллу компанияда ишлерге да угъай демейме. Муратынга жетер ючюн а, арымай, эрикмей, санга ышаннган юйюрюнгю тюнгюлтмей окъургъа керек сунама, - дейди ол.

Юриспруденцияны жоллары кёпдюле. Аланы тиширыугъа жаланда бир къаууму келишген сунады мени жигитим. Аны оюмуна кёре, следственный комитетде бла полицияда иш жаланда эр кишиленики болургъа керекди.

Окъууну бошагъандан сора Назиля ишин къыралыбызны ара шахарында, республикабызда да бардырыргъа дейди. Ол кесини жашагъан шахарын а болмагъанча чексиз сюеди. Къыз Къулийланы Къайсын атлы Маданият юйге тынгылы ремонт этилип ачылгъан кюнлени кесини насып чакъларынча эсгереди. Аны ючюн КъМР-ни Парламентини депутаты Сотталаны Къурман Сейитовичге да ыразылыгъын билдиреди. Аны хайыры бла районну кёп мекямларына тынгылы ремонт этилип, айныгъанларын да чертеди.

Назиля, сабийлигин уллу хычыуунлукъ бла эсгере, аппасы Зулкъарний эмда аммалары Люаза бла Жамиля жашаугъа ариу кёзден къараргъа юйретгенлерин жылыулукъ бла айтады. Ёмюрде адамны жанын къыйнамазгъа, тюзлюкню жолу бла барыргъа, тыш жерде болса да, туугъан жерин сатмазгъа, унутмазгъа, сом ючюн бет жоймазгъа да юйретгендиле къартла туудукъларын.

- Атама бла анама, эгечлериме жюрегимден ыразылыгъымы билдирирге сюеме. Аланы сюймекликлери бла жылыулары мени кеси кючюме ийнандыра, аягъы юсюмде турургъа кюч бередиле. Мен насыплыма, насыб а таза жюрекди, ариу ниетди, кючюнге ийнаныуду, жеринге, юйюрюнге сюймекликди.  Билмейме, къадар къалай боллугъун, алай халкъыма хайырымы тийдирирге уа итинирикме, - дейди бизни бла ушагъында Ёзденланы къызлары. 

Ариулукъну жюрегине сыйындырып жашагъан, билимге итиннген Назилягъа, бирси ахшы къызларыбызгъа да Тиширыуланы халкъла аралы кюнюню аллында биз насып, жетишим да тежейбиз.