УФСБ: Жалгъан аракъы чыгъаргъаны ючюн терсленеди

Контрафакт продукцияны законсуз сатылмазча  мадарланы толтургъан кезиуде РФ-ни ФСБ-сыны КъМР-де Управлениясыны келечилери, республиканы полициячылары бла бирге Басхан районну 25-жыллыкъ инсаныны аманлыкъ ишин тохтатхандыла. Ол къырал маркалары болмагъан жалгъан ичги затланы хазырлагъаны, сатып алгъаны, асырагъаны эм ташыгъаны ючюн терсленеди. 

Псыхурей элде бардырылгъан тинтиулени кезиуюнде жалгъан аракъы чыгъаргъан цех табылгъанды. Законсуз сатыу-алыудан сатаргъа хазыр этилген 5 минг шеша сыйырылгъанды. Аланы юсюнде акциз маркалары жокъ эди. 

РФ-ни УК-сыны 171.1-чи статьясыны 6-чы кесегини «б» пунктуна эм 171.3-чю статьясыны 2-чи кесегини «б» пунктуна кёре терслеу материалла ачылгъандыла. УФСБ-ны пресс-службасындан бизге билдиргенлерича, законлагъа кёре быллай аманлыкъ этгенни эркинлиги 6 жылгъа дери сыйырылыргъа боллукъду.