Премьерагъа чакъырадыла

М. Горький атлы Орус драма театр Тиширыуланы халкъла аралы кюнюню аллында, 4 мартда 19:00 сагъатда, кесини сахнасында француз жазыучу Робер Томаны «Восемь любящих женщин» пьесасына кёре салыннган ол ат бла премьера спектакльни кёргюзтюрюкдю.

Оюн чам халлы детектив жанрда салыннганды. Сюжет къар басып тыш дуниядан чекленип тургъан омакъ юйде тынчлыкълы юйюрню таматасын билмей тургъанлай ёлтюрюуден башланады. Ол ачыулу болум сыйлы Рождествону белгилерге деп тургъан юч тёлюню тиширыуларыны эмда юйдегилени ырахат байламлыкъларын бузады.

Ала мурдарлыкъны ким этгенин тохташдырырча, къыйын юйюр къозгъалыуланы бир ызгъа жыйып, ангылашымлы этерге кюрешгенлерине шагъат болады къараучу. Кёз аллынгда омакъ сыфатлы башха-башха жыл сандагъы тиширыула сюеледиле, «сюйген» аналача, къызлача эмда юй бийчелеча кийилген бет къапланы артында къатылыкъ бла ырысхы ючюн бир бирни жыртыу туура кёрюнеди. Озгъан ёмюрню 50-чи жылларыны буржуазия жамауатына бу жютю чам кесини магъаналылыгъын бюгюн да тас этмегенди.