Айырмалыланы атлары ачыкъланнгандыла

Газетибиз билдире тургъаныча, Къабарты-Малкъар къырал университетни мурдорунда быйыл да «Профессионалла-2026» Битеуроссей усталыкъ чемпионатны регион уруму кезиулю кере бардырылгъанды. Бу жол республикабыз аны ызларындан 45-сине къатышыргъа хазырлыгъын билдирген эди. Университетде билим алгъанла уа аны сегиз тюрлю бёлюмюне къошулгъандыла. 

«Профессионалла» атлы эришиу РФ-ни Правительствосуну тутхучлулугъу бла «Билим бериу» миллет проектни «Профессионалитет» федерал проектини чеклеринде талай жылдан бери бардырылады. «Профессионалла» – ол бийик даражалы усталыкъ хунерлери болгъанланы хазырлагъан мурдорлу майданды. Чемпионатны баш мураты уа, орта профессионал билим берген системаны игилендириу бла бирге, хунерли жаш тёлюню баямлауду эмда аланы иш бла жалчытыугъа тири халда себеплик этиудю.

КъМКъУ-ну колледжлеринден а бу жол эришиуге 41 жаш адам къошулгъанды. Ала уа, аны кезиуюнде, жаланда теория жаны бла билимли болгъанларын ачыкълап къоймай, практика жаны бла да хазырлыкъларыны тынгылылыгъын кёргюзтгендиле. Андан тышында да, алчы технологияланы эмда шёндюгюлю оборудованияланы ышаннгылы халда хайырлана билгенлерин баямлагъандыла. 

Эришиуге къатышханлагъа 56 эксперт багъа салгъанды. Жюрини келечилери уа, колледжлени устазларындан сора да, республиканы даражалы билим бериу махкемелеринден адамла, усталыкъ жаны бла ахшы сынамлары барла, иш

Окъуу юйню орта профессионал билим берген управлениясыны таматасы Мадина Таова билдиргеннге кёре, университет усталыкъ хунерни ачыкълау бла байламлы къырал даражада бардырылгъан эришиуге 2016 жылдан бери къатышады. Эм алгъа уа ол мында эки майдандан – «Мектепге дери юйретиу» эмда «Башланнган класслада окъутуу» – башланнганды. 

– Быйыл биз «Профессионалла» атлы чемпионатны регион урумунда хорлагъанланы онунчу кере алгъышлайбыз. Ол шарт а ишибизни къалай баргъанын да ачыкълайды. Алай эсе да, аны бла чекленип къаллыкъ тюйюлбюз. Жаланда быйыл окъуна эки жангы майданны ачханбыз – «Туроператор иш» эмда «Энчиленнген саулукъ сакълау технологияла». Биз быллай айныуну магъанасын да кёребиз, жылдан-жылгъа эришиуге къатышыргъа сюйгенлени саны ёсюп барады.

Аны ючюн а сиз да чемпионат къымылдауну КъМКъУ-ну чеклеринде айныууна себеплик этеригизге ышанама. Бирге ишлей усталыкъ хунерлери бийик болгъанланы хазырлауну да жангы даражагъа жетдирирге къолубуздан келликди, – дегенди Мадина Таова, жаш адамлагъа эмда аланы насийхатчыларына айланып.

Бу кюнледе эришиуге къатышханланы эсеплери да чыгъарылгъандыла. Алай бла, чемпионатны регион урумуну кезиуюнде университетде бардырылгъан сегиз тюрлю ыздан сынаулада жыйырмадан аслам адам хорлагъанды эмда призёр болгъанды. 

Белгиленнгенлени арасында таулу жашла бла къызла да бардыла. Сёз ючюн, Мурзаланы Диана «Мектепге дери юйретиу» деген ызда биринчи жерге тийишли болгъанды. Атмырзаланы Ислам да «Веб-технологиялада» хорлагъанды.

«Энчиленнген саулукъ сакълау технологиялада» Чабдарланы Аминагъа экинчи орун берилгенди. 

«Багъыу иш» ызны «Фельдшер» бёлюмюнде биринчи уа Созайланы Маликады. Дагъыда бу сынауда ючюнчюге Алакайланы Алийхан чыкъгъанды. Мокъаланы Малика да «Киндик ана» ызда экинчи жерге тийишли болгъанды. 

Атлары сагъынылгъанланы барысы да, башхача айтханда уа, «Профессионалла-2026» чемпионатны республика даражада озгъан кезиуню алчылары бла призёрлары энди эришиуню федерал урумуна къатышырыкъдыла.

Жюрини санында уа баш экспертле КъМКъУ-ну педагогика колледжинде окъутхан Аттасауланы Жаннета бла КИТиЭ-ни преподаватели Жолабланы Фатима, медицина колледжни преподаватели Байсолтанланы Фатиля да ишлегендиле.