Жашил да, таза да болурча

Быйыл майгъа дери Нальчикде тёрт минг чакълы терек бла юлкю орнатыргъа белгиленеди. Аланы кёбюсю биринчи жыллада окъуна тамырланып эм чагъып башларчаладыла. 

Тёгерек-башны жашиллендириу бла байламлы жумушла шахарны тюрлю-тюрлю районларында ётерикдиле. Ол санда Къулийланы Къайсын атлы проспектде – 33 жёге, Пушкин атлы орамда – 30 кюйрюч, Кешоков атлы орамда 80 жёге орнатыллыкъдыла. 

Къабарты орамда 117 кюйрюч бла шахбурун терекле салынырыкъдыла. Андан сора да,  Ногмов атлы орамда – 70, Щорс атлы орамда – 80 эм  Толстой  атлы орамда да 28 акътерек ол тийрелеге айбатлыкъ къошарыкъдыла. Саулай алып айтханда, тереклени саны жети жюзге жете кетерикди.   

Аны бла бирге Къулийланы Къайсынны атын жюрютген проспектде – 300, Шогенцуков атлы проспектде – 2 минг бёрюбауур, Къабарты орамда уа  670 япон  ташлауукъ орнатыллыкъдыла.  

Бу акцияны магъанасы – Нальчикде хауа таза болурча этиудю эмда  шахарда  саулай да болумну  игилендириудю.