Кеслерине эм башхалагъа да къоркъуу саладыла

Эркинликсиз кёк отлукъ ызгъа къошулгъанланы тинтирча   «Газпром межрегионгаз Нальчик» эм «Газпром газораспределение Нальчик» биригиулени специалистлери  дайым рейдле бардырадыла.  Аны кезиуюнде  алгъаракълада газны хайырланмазча чек салыннган абонентлеге энчи эс бурулады. Жарсыугъа,  аланы  арасында иги кесек адам  борчларын жабар амалтын экинчи кере да эркинликсиз къошуладыла, деп билдириледи кёк отлукъ бла жалчытхан биригиуню пресс-службасындан.

Алай бла былтыр биригиуню келечилери ич ишлени органлары бла бирге 800-ден артыкъ  шартны ачыкълагъандыла. Саулай алып айтханда, бузукъчула 53 миллион  сом багъасына къоранч салгъандыла.  Келтирилген юлгюде окъуна жерлешлерибиз къаллай уллу  хата  салгъанларын  кёрюрге боллукъду.  Аны бла бирге законодательствогъа бузукълукъ этгенден тышында, жашау журтха эм  къоншуларына да уллу къоркъуу саладыла.

Газны урлагъанла Административ бузукъланы кодексини 7.19-чу статьясына тийишлиликде тазир тёлерикдиле. Аны ёлчеми энчи иелилеге  10-15  минг сомгъа жетеди. Экинчи бузукълукъ этселе аманлыкъчыла, РФ-ни Уголовный кодексини 215.3-чю статьясына кёре, эки жылгъа тутулургъа да боллукъдула. Аны хатасындан адам ёлсе,  ол сегиз жылгъа жетеди. Урланнган кёк отлукъну ёлчеми  тинтилсе, бузукълукъчу РФ-ни Уголовный кодексини 158-чи статьясына тийишлиликде (Урлагъан) 100 минг сомдан артыкъ  тазир тёлерге неда алты жылгъа олтурургъа  тюшерикди. 

Андан сора да, кеси аллына кёк отлукъгъа къошулгъаны ачыкъланса, аны мычымай быргъысын кеседиле.  Алай бла кёк отлукъ бла жалчытхан биригиу бузукълукъ этилгенине акт жазады эм эсеплеген приборсуз къоратылгъан газны ёлчемин тийишли мардалагъа кёре санайды. Ол алты айны  ичинде къыш кезиуде хайырланылгъаныча  тергеледи.

Эркинликсиз къошулгъаннга быллай шартла саналадыла: эркинликсиз газ тартса, проектде болгъандан башха тюрлендирсе, кеси аллына  газ оборудованиягъа  ремонт этсе, газ оборудование болгъан жерде  кеси аллына планировка бардырса, газ бла байламлы ишлени  аллай эркинлиги болмагъан адамгъа неда организациягъа  этдирсе.    

Эсге сала айтсакъ,  «Газпром межрегионгаз Нальчик» биригиу Къабарты-Малкъарда жашагъан инсанланы уллу кёллюлюк этмей,  эслирек болургъа, эркинликсиз газ ызгъа къошулмазгъа  чакъырады.  Аллай шартны эслеген адам,   созмай, диспетчер службагъа  104  телефон  номерге   сёлешип билдирирге борчлуду. Андан сора да,   контроль бардыргъан жер-жерли органлагъа айтыргъа боллукъду. Ол адамны жашауун сакъларгъа болушуругъун да белгилеп айтырчады.