Хайырланыучуланы сылтаусуз этерча

Быйыл «Россети Северный Кавказ» – «Каббалкэнерго» биригиуню келечилери 245,7 километрде ток баргъан тюрлю-тюрлю класслы  ызлагъа  ремонт этерикдиле.  Ишлени биринчи кесегинде 112,3 километрде 35-110 кВ эм 133,4 километрде да  0,4-10 кВ. чыбыкълагъа къараллыкъды. 

Андан сора да,  44 километрде чыбыкъланы  тышларында изоляциясы (СИП) болгъаннга алышырыкъдыла.  Аллай  чыбыкъла не жаны бла да къыйматлыдыла. Ол санда къыйын хауа болумлагъа чыдамлыдыла эм адамгъа,  жаныуаргъа да къоркъуусуздула. Аны бла бирге анга эркинликсиз къошулуп,  токну урларгъа да къыйын боллукъду. 

Ишлени кезиуюнде 688 тозурагъан чыпынны, 5,7 минг чакълы изоляторну  да жангы тюрлюлерине алышырыкъдыла. 

Дагъыда  76 гектарда ток  ызлагъа  жууукъда  ёсген  эм чырмау  салгъан  тереклени бла юлкюлени да кесип кетерликдиле.  Электрокюч комплекс тийишли халда ишлерча  быллай ишлени заманында толтуруу бек магъаналыды. Желлени, жауунланы кезиулеринде  жууукъда ёсген битимле замыкание этдирирге боллукъдула. Аны хатасындан ток чыбыкъ юзюлюрге, абонентлени элекрокючсюз къойгъандан сора да, бир тюрлю хата салырына къоркъуулуду. 

Ол себепден техника болум тийишли халда сакъланырча эм энергообъектлеге ремонт этилирча  программаны чеклеринде сагъынылгъан жумушла жыл сайын бардырыладыла.