Къууанчлы халда ачылгъанды

Нальчикде бу кюнледе 73-чю номерли сабий сад тапландырылгъанындан сора къууанчлы халда ачылгъанды. Мекямгъа ремонт «Жаш тёлю эмда сабийле» миллет проектни чеклеринде этилгенди. Алай бла, махкемени чардагъы, инженер коммуникациялары алышындырылгъандыла,  технология жаны бла оборудованиясы жангыртылгъанды. Андан тышында да, жангы мебель эмда илляула сатылып алыннгандыла.

Шахарда бу садикни хайырланыугъа бериуню уа республикада, саулай къыралдача, Мектепге дери билим бериуню жылыны  ачылыууна жоралагъандыла. Къууанчлы жыйылыугъа КъМР-ни жарыкъландырыу эмда илму министри Анзор Езаов да къатышханды.

Жыйылыу видеоконференция халда къуралып, аны ишине  Владимир, Новгород эмда Новосибирск областьланы билим берген махкемелери да къошулгъандыла. Жангыртылгъан садикни хайырланыргъа берилгени эмда Мектепге дери билим бериуню жылы ачылгъаны бла видео байламлыкъ халда РФ-ни жарыкъландырыу министри Сергей Кравцов алгъышлагъанды. Ол саулай да къыралда сабийлени юйретиуге эмда айнытыугъа тийишли эмда шёндюгюлю излемлеге келишген болумланы къурау уллу магъананы  тутханын чертгенди.

Анзор Клишбиевич да, жыйылгъанланы алгъышлай, Сергей Сергеевичге регионнга школгъа дери окъутуу бла байламлы эс бурулгъанына эмда дайым тутхучлулукъ этилгенлей тургъанына ыразылыгъын билдиргенди.