Сабанчыла жаз башы ишлеге хазырдыла

Кёп болмай «Минводы Экспо» кёрмюч комплексде Россейни Эл мюлк министрини орунбасары  Андрей Разинни башчылыгъында кенгеш бардырылгъанды. Анга эл мюлк министерстволаны  таматалары къатышхандыла, ол санда  КъМР-ден Хасан Сижажев да.

Жыйылыуда Шимал-Кавказ федерал округну субъектлери жаз башы сабан ишлеге къалай хазырланнганларына къаралгъанды. Аны юсюнден билдириуле бла регионланы келечилери сёлешгендиле. Хасан Сижажев былтыр республиканы эл мюлкюнде уруннганла жетишимлери бла къууандыргъанларын белгилегенди. Ол санда эл  мюлк продукцияны битеу тюрлюлеринден  126,7 миллиард сом багъасы чыгъарылгъанын, ол а 2024 жыл бла тенглешдиргенде, 103,7 процентге дери ёсгенин айтханды. Хар замандача, тирликни асламысы жыл сайын аслам жерде ёсдюрюлген тёрели битимлеге жетеди.

  - Былтыр урлукъла 55 минг гектарда агротехника болжалладан кеч къалмай  салыннгандыла.  Бюгюнлюкде кюзлюклени асламысында, неда 80 процентинде, иги болум сакъланады. Къалгъан 20 процентинде да жарсырча зат жокъду. Аны бла мюлкледе жаз башы сабан ишлеге  хазырланыу да къыстау барады. Урлукъладан, минерал семиртгичледен эм башха керекледен да  жетерча къыстырыкъ этилгенди,-  деп билдиргенди Хасан Лябидович.

 Ол айтханна кёре, эл мюлк техниканы жангыртыу жаны бла да жыл сайын мадар этилмей къалмайды. «Быйыл да 20 трактор алыннганды. Аладан тогъузусу лизинг амал бла хайырланыладыла. Мюлкле бла тири байламлыкъ жюрютюледи эм къысха заманда  жарсыуларына эс бурулады», - деп къошханды министр.