Токну уралагъан бютюн кёп тёлейди

Былтыр  «Россети Северный-Кавказ» – «Каббалкэнерго» биригиуню келечилери электрокюч ючюн  тёлемей хайырланыргъа сюйгенлени тинтирча рейд бардыргъандыла. Эм биринчи,  ала  алгъаракълада чек салыннган 13069 абонентни жокълагъандыла. Аны кезиуюнде токну урлау бла байламлы 57 шарт ачыкъланнганды. Бузукълукъланы иги кесеги Прохладна районнга жетеди. Мында кеслери алларына къошулгъан эм токну эсеплеген приборсуз хайырланнган   44 абонент тинтилгенди.

Аланы хар бири бла байламлы  законодательствону чеклеринде иш ачылгъанды. Алай бла токну урлагъанла Административ бузукълукъланы кодексини 7.19-чу статьясына тийишлиликде (Сетьлеге эркинликсиз къошулгъанла эм токну эсеплеген приборсуз хайырланнганла) тазир тёлерикдиле. Аны ёлчеми энчи иелилеге - 10-15 минг,  организациялагъа уа 100-200 минг сомгъа жетеди. Андан сора да, бир-бир аманлыкъчыла РФ-ни Уголовный кодексини 165-чи статьясына кёре, эки жылгъа тутулургъа да боллукъдула.

Экинчи кере эркинликсиз ток ызгъа къошулгъан энчи иеге 15-30 минг сом тазир тёлерге тюшерикди. Аллай бузукълукъ этген организациягъа уа аны ёлчеми 300-400 минг сомгъа жетеди. Бир-бирле РФ-ни Уголовный кодексини 165-чи статьясына кёре эки жылгъа тутулургъа да боллукъдула.

- Энергокючню  урлагъан ток бла жалчытхан биригиуге уллу къоранч салады.  Аны бла бирге  уллу хатагъа келтирирге да боллукъду. Кеслери алларына къалай болса да тартылгъан  ток чыбыкъла   ёртенни къозгъаргъа, адамны саулугъуна хата салыргъа эм  къыйыры къоншулагъа окъуна жетерге боллукъду,- дейди «Россети Северный - Кавказ» биригиу, хайырланыучуланы эслерине сала.   

Ток ызлагъа эркинликсиз къошулгъанланы неда башха бир тюрлю бузукълукъ этилгенини юсюнден «Россети» биригиуню "къызыу ызына" сёлешип билдирирге боллукъду: 8-800-220-0-220  неда 220. 

Эсге сала айтсакъ, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа ишлерин сюдге бериу, токну хайырланалмазча чек салыу да киреди. Уллу кёллюлюк этгеннге  борчундан тышында юсюне тазир да тёлерге тюшерикди.

Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

Бюгюнлюкде «Свет онлайн» приложенияны иги кесек адам хайырланады. Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Аны себеплиги бла комиссиясыз тёлерге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм тёлеулени уа онусуна дери этерге кереклерин эсге саладыла.