Сабийлери болгъан юйюрлеге себепликге энтта да бир амал

Быйылдан башлап, Къабарты-Малкъар Республикада сабийли юйюрле жыл сайын берилген тёлеу къоллу болургъа боллукъдула. РФ-ни Социал фондуну (СФР) регионда бёлюмюнден билдиргенлерине кёре, анга эки неда андан кёп сабий ёсдюрген, кеслери да уруннган ата-анала (ол санда осуйлукъ этгенле, сабийлени кеслерине алгъанла, алагъа кёз-къулакъ болгъанла) тийишлидиле. Сёз мында ала берген НДФЛ-ни бир кесегин кеслерине къайтарыуну юсюнден барады.

Бу амал быллай юйюрге бериледи: анга тюшген файда, адам башына тергегенде, жашау этерге жараулу ахчаны 1,5 кересине жетмеген.

Юйюрню адам башына тергелген орта файдасына урунуу, предпринимательство эмда профессионал ишледен келген ахча саналады. Кеси да сагъынылгъан тёлеуню излеген жылны аллында жыл ючюн. Андан сора да, ол тёлеуню жазгъанда, юйюрню мюлк болуму (жеринден тепдирилмеген эмда тепдирилген мюлкю), дагъыда алимент борчлары болмагъаны эсге алынырыкъды.

Дагъыда бу тёлеуню бергенде,  юйюрню къурамы эсге алынырыкъды, ол санда заявканы берген инсан, аны юйдегиси, акъылбалыкъ болмагъан неда анда осуйлукъда болгъан сабийле, сора 23 жыллары да толмай, очно халда окъугъан студентле.

Тийишли заявленияны СФР-ни Къабарты-Малкъар Республикада бёлюмюне ата неда ана жиберирге боллукъдула. Аны «Госуслуги» порталда, МФЦ-де неда фондну бёлюмюню хайырланыучула бла ишлеген службасында этерге боллукъду. Андан ары фондну специалистлери керекли шартланы ведомстволаны арасында байламлыкъла система бла кеслери излерикдиле. Тёлеуню тохташдырыу оноуну 10 ишчи кюнню ичинде этип, сагъынылгъан порталгъа жиберликдиле.

Республиканы адамларына эслерин бурабыз: фондха заявленияны быйыл 1 июньдан 1 октябрьге дери жиберирге керекди. Аллай эркинлик Россей Федерацияны инсанларына, кеслери да дайым бизни къыралда жашап тургъанлагъа бериледи.

Жыл сайын бериллик юйюр тёлеуню жарашдырыуну эмда аны ёлчемин тергеуню юсюнден толуракъ информацияны Россейни Социал фондуну сайтында «Ежегодная семейная выплата» деген бёлюмюнде табарыкъсыз. Сорууугъуз бар эсе, 8-800-1-00000-1 номер бла (ишчи кюнледе) сёлешигиз. Битеу жангы информация ведомствону сайтында, аны ВКонтакте эм Одноклассники сетьледе, Телеграм эм Мах мессенджерледе бетлеринде да басмаланады.