Жан-жанындан «душман» чапса, иммунитет кемчиликле бла ишлерикди

Бу ыйыкъда Россейни Саулукъ сакълау министерствосу иммунитетни сакълаугъа эм кючлеуге жоралагъанды.  Аны чеклеринде КъМР-ни Саулукъ сакълау министерствосуну Психиатрияны бла наркологияны республикалы клиника арасындан аракъы, тютюн, наркотикле адамны саулугъуна къаллай хата келтиргенлерин ангылатадыла.

Бирле, мени саулугъум игиди, кючлюдю, манга ауруу жетерик тюйюлдю, деп сунадыла.  Иммунитетни бизни саулугъубузну сакълагъан аскер бла тенглешдирирге боллукъду, алай анга жан-жанындан «душман» чапса, ол кемчиликле бла ишлеп башларыкъды.

Биринчиден, ичги затла. Аракъы, аныча адамны эсиртген ичгиле (бир стакан окъуна) иммунитетни 24 сагъатха къарыусуз этедиле. Алай адам хар кюн да эсирип, аракъысыз болалмаса, аны санлары пневмониягъа, жукъгъан ауруулагъа ачыкъ боладыла.

Тютюн, ол санда бюгюн жаш адамланы арасында кенг жайылгъан электрон тютюнле, вейпле, ёпкелеге хата саладыла. Ала уудан тазаланалмай, хырыу ичинде къаладыла. Анда уа бактерияла терк жайыладыла.

 Наркотикле иммунитетни «таянчагъын» бузадыла – сюек мыйыны. Иммунный клеткала анда жаратылгъанлары эртте белгилиди. Наркоманны санлары къарыусуз боладыла, бауургъа бютюнда уллу заран жетеди. Адамны санларындан битеу ууну уа ол чыгъарады. Алай бла наркотиклени ичгеннге инфекция терк жугъаргъа боллукъду.

Сагъыш эте билген, кесини саулугъу ючюн жууаплы адам бу затланы ангыларгъа керекди. Аракъыны ичгенни орунуна жаяу айланыгъыз, тютюнню къоялмай эсегиз, азыракъ ичип, ёпкелеригизге тазаланыргъа онг беригиз. Дагъыда сууну кёп ичигиз, иммунитет суусуз болалмайды, деп юйретедиле араны врачлары.

Алай кесигиз аллыгъызгъа бу осал къылыкъланы къоялмай эсегиз, клиниканы врачлары сизге болушургъа хазырдыла.