Патриот сезимлерин, къарыуларын да кючлендирген оюн

«Биринчилени атламлары», «ЮНАРМИЯ» эм «ВОИН» ара Россейни Жаш тёлюню ишлери жаны бла федерал агентствону бла РФ-ни Жарыкъландырыу министерствосуну себепликлери бла  «Зариница 2.0» битеуроссей аскер-патриот оюнну 3-чю кезиуюн башлагъандыла. Ол 23 февральда  Хорламны музейинде Россейни Жигитлерини, «Жигитлени заманы» президент программада эмда СВО-да атларын айтдыргъанланы, насийхатчыланы, алгъыннгы оюнлада алчы жерлеге чыкъгъанланы да къатышыулары бла къууанчлы халда ачылгъанды.

«Зарница 2.0» аскер-патриот  оюннга Россейни битеу жерлеринден да жашла бла къызла къатышадыла. Ала сынаулу насийхатчыланы башчылыкълары бла  къыйын кезиуледе керекли амалла излерге юйренедиле, ниетлерин, акъылларын да кючлейдиле. Проект бардырылгъан кезиуде ала жашауларында керек боллукъ затлагъа тюшюнюрюкдюле, жангы технологияла бла да шагъырейленирикдиле. Оюннга «Мында адам чыныгъады» деп   да бошдан атамагъандыла.

- Юч жылны ичинде «Зарница 2.0» миллионла бла саналгъан школчуланы бла студентлени бирикдиргенди. Сора аны Ата журтну къоруулаучуну кюнюнде башлагъаныбыз да бошдан тюйюлдю. Быйылдан башлап анга къатышыргъа сюйгенлени жыл санларын 23-ге дери кётюргенбиз. Педагогика вузлада окъугъанланы уа насийхатчылыкъ этер онглары да боллукъду. Студентлеге деп онлайн-курсларыбызны да жангыртханбыз. Ала сабийлеге тарыхдан, Россейни къуралыууну эм аскерчиликни юслеринден толуракъ билим алыргъа болушурукъдула.  

Шёндюгю «Зарница 2.0» жаш тёлюге ала школда аскер хазырлыкъны дерслеринде алгъан билимлерин ишде хайырланыргъа онг береди. Дагъыда ол аскер къуллукъгъа сейирни къозгъау жаны бла да аламат майданды. Ким биледи, бу оюндан сора бирле аскер училищелеге барыргъа сюер эселе уа, - деп чертгенди Россейни Жигити, «Биринчилени атламлары» битеуроссей биригиуню правленини таматасы Артур Орлов.   

Быйыл оюннга къатышханланы жыл санлары 7-ден 23-ге дериди. Анга кёре ала 4 къауум болуп эриширикдиле. Дагъыда бу жолдан тебиреп, проектге связьчы усталыкъ да кийириледи. Ала отрядны ичинде связьны жалчытыугъа жууаплыдыла.

Россейни Жигити, «ЮНАРМИЯ» биригиуню Баш штабыны таматасы Владислав Головин белгилегеннге кёре, ала, былтыр болгъан кемчиликлени эсге алып, быйыл тынгылы хазырланнгандыла.

- Аны себепли быйыл хар не да бютюнда бийик даражада ётеригине ийнанама. Проект жаш адамланы биригип ишлерге юйретгени бек магъаналыды, - деп чертгенди ол.

Бу оюнну бардырыуда насийхатчылагъа энчи эс бёлюнеди. Быйыл «ВОИН» арадан проектге 100-ден артыкъ инструктор къатышадыла. 

- Ала «Зарницаны» битеу кезиулеринде да ишлерикдиле. Тактикалы медицина, ушкокдан атдырыу, БПЛА-ны учура билиу дегенча керекли затлагъа юйретирикдиле, - деп билдиргенди Россейни Жигити, «ВОИН» араны командири Андраник Гаспарян. 
Былтыр республиканы атындан эришиуге  Прималкинское элни школуну «Отвага 07» деген командасы къатышханды. Быйыл анга къатышыргъа сюйгенле уа  аны юсюнден «Зарница 2.0» проектни энчи сайтына жазып билдирирге  боллукъдула.