Билдириулени бирикдирликдиле

Шимал-Кавказ федерал округда (СКФО) инвесторла бла ишлерик цифралы хаб (инвесторла бла бирге ишлеуню хабы) къуралады. Россейни Правительствосуну председателини орунбасары Александр Новакны башламчылыгъы бла бу проектни жашауда «Кавказ. РФ» институт бардырады. Ол федерал округну экономикасына капиталны келиуюне себеплик этерикди.

Цифралы платформа промышленностьда, энергетикада, туризмде, аграр эм башха бёлюмледе файда берлик проектлени эм энчи экономика зоналаны резидентлерини юслеринден информацияны бирикдирликди. «Кавказ.РФ» экспертизадан, келишимлени жарашдырыудан башлап, къыралдан болушлукъ алыуну жумушларына дери инвесторлагъа болушлукъ этген операторну жумушларын тамамларыкъды.

Бу хабны жумушларына айнытыуну институтларындан, банкладан тышында энчи иели инвесторла да къатышырыкъдыла. Шимал - Кавказ федерал округда терк файда берлик 38 проектге 416 миллиард сом салымла этилгендиле. Аладан 85 проценти энчи иелилени ахчаларыдыла. 2030 жылгъа федерал округну экономикасын 1,9 триллион сом инвестицияла бла жалчытыргъа планла бардыла.

Къабарты-Малкъарда жылны ичинде тохтаусуз ишлеген «Эльбрус» курортну айнытыуну, Тырныауузда тау-байыкъландырыучу комбинатны къурауну, Чегемде теплицаланы комплексин андан ары айнытыуну эм башха проектлени жашауда бардырыуну жумушлары бардырыладыла.

Цифралы хаб,  аллай энчи башламчылыкъланы бирикдирип, алагъа керекли финанс салымланы белгили этерикди, ол а инвесторланы къоранчларын азайтырыкъды.