«Сиз къыралыбызны ёхтемлигисиз!»

Бу кюнледе Нарткъалада районну Маданият юйюню келечилери Владикавказда госпитальладан биринде концерт кёргюзтгендиле. Белгилисича, ол госпитальда СВО-гъа къатышхан жашларыбыз кеслерине бакъдырадыла. 

Бу огъурлу ишге Урван районда къаугъалада сакъат болгъан аскерчилени «ВоИн»  битеуроссей жамауат биригиулерини таматасы Алик Дзуганов, «Эдельвейс» адабият-поэтика биригиуден Амин Хавпачев да къатышхандыла. Дагъыда Нарткъаланы адабият мекямындан къошулгъанланы араларында КъМР-ни маданиятыны сыйлы къуллукъчусу Валерий Шогенов, белгили хореограф Марьяна Саральп да болгъандыла. Дагъыда бу ишге Любовь Шерхова, Карина Иванова, Руслан Нетребин, Алим Тхостов, Залим Мисостишхов, жырла жазгъан, аланы жырлагъан да Милана Вологирова юлюшлерин къошхандыла.

Концерт къауумну келгенини хапары эрлай окъуна жайылгъанды. Госпитальда жатхан аскерчиле, ол санда ауур жаралы болгъанла: Кахун элден Ислам Гятов бла Псыгансуудан Рустам Темирканов, мекямны актовый залына жыйылдыла.

Былагъа къобаргъа эркинлик берилмегенликге, ала дагъыда битеу кючлерин салып тынгылай эдиле келгенлеге. Аны къой,  жырчылагъа эжиу этгендиле. «Нартхаса» той-оюн къауумну солистлери Милана Мерова эмда Инал Кашежев бла бирге тепсеу къымылдауланы къайтарыргъа кюреше эдиле.
Артистле да, жууаплылыкъларын ангылап, саусузланы келлерин кётюрюр ючюн фахмуларын, къарыуларын да аямагъандыла, жашаугъа ёхтем къарагъан тылпыу салыргъа кюрешгендиле.

 «Сиз къыралыбызны жалынчакъсызлыгъын эмда бизни жашауубузну къоруулайсыз. Сизни аллыгъызда баш урабыз. Бизни жюреклерибиздесиз. Битеу Россейни ёхтемлигисиз!» - дегенди Марьяна Саральп, аскерчилеге ыразылыгъын билдире.

«Артистлерибиз бек уллу иш этгендиле. Быллай кёллендирген къууанчла кёбюрек боллукъларына ышанама. Жашларыбыз терк сау болуп чыгъарларын тежейме!» - дегенди Алик Дзуганов.

Госпитальгъа барыуну Урван районну жаш техниклерини станциясыны патриот ниетде юйретиуню З.А. Налоев атлы арасыны башчысы Беслан Гуляжинов районну Маданият юйю бла бирге Ата журтну къоруулаучусуну кюнюне жоралап къурагъанды. Анга Россей Федерацияны Следствие комитетини Къабарты-Малкъар Республикада Следствие управлениясы себеплик этгенди.