Фатарда суу таза тюйюл эсе, кимди терс?

Фатаргъа келген суу иги, таза, къоркъуусузлу болургъа керекди. Алай бирде уа крандан мутхуз, сора ийиси бла татыуу да осал болгъан, юзмезли неда тот суу келирге боллукъду. Анга уа кимди жууаплы? Бу соруугъа Роспотребнадзорну Къабарты-Малкъарда бёлюмюнде жууап бергендиле.

Анга,  эм биринчиден,  ресурсла бла жалчытхан организация къараргъа керекди. Асламысында ол  водоканалды. Жууаплылыкъ да аны боюнундады. Суу санитар излемлеге келишгенине контрольну ол этеди. Суу кеп фатарлы юйге жетгинчи, аны качествосуна кёз-къулакъ болуу, тазалау, дезинфекция – ала бары да ол организацияны борчларыдыла.

Алай чурумла уа юйню ичинде чыгъаргъа боллукъдула. Сёз ючюн, тот басхан быргъыла, тазалау, дезинфекция этиу да болмагъаны сууну качествосун бузадыла. Алагъа уа юйню жумушларына къарагъан компания (УК) неда ТСЖ жууаплыдыла.

Бирле фатарларында быргъылагъа, сууну бютюнда иги тазаларча, энчи фильтрле къошадыла. Аланы уа кезиу-кезиу алыша турмаса, сууну качествосу осалдан - осал болуп барлыкъды.

Къалай-алай болса да, крандан келген сууну жаратмай эсегиз, аны юсюнден Роспотребнадзоргъа сёлешип билдирирге эркинсиз. Ведомствону специалистлери аны сылтауун тинтип, суу санитар излемлеге келишмегенин тохташдырсала,  бир тюрлю мадар этмей къоярыкъ тюйюлдюле.

Сиз тургъан неда жашагъан жерде сууну качествосун билирге сюе эсегиз, интернетде https://питьеваявода.рус сайтха кирип, интерактив картагъа къарагъыз. Дагъыда эсигизде болсун: суу бла жалчытыуну жаланда закон бла белгиленнген заманнга тыяргъа жарайды. Аны качествосу  осал болса уа, тёленнген багъасын къайтарыргъа эркинлигигиз барды.