Тамата тёлюде ахчаны жюрютюуню юсюнден толу ангылау болурча

Россейни Банкы тамата къауумну финанс окъуулулукъдан вебинарлагъа къатышыргъа чакъырады. Аны кезиуюнде берилген билим алагъа финанс продуктланы эмда жумушланы дуниясында абызырамазгъа, хар неге да тюшюнюрге болушурукъду. Кезиулю сессия быйыл 22 апрельге дери бардырыллыкъды, деп билдиргендиле Банкны Къабарты-Малкъарда бёлюмюнден.

Окъутуу программа быллай бёлюмледен къуралады: «Финансла жашаугъа», «Финанс къоркъуусузлукъ», «Банкланы жумушлары», «Башхадан къалгъан мюлкге ие болуу». Вебинарлагъа инсан жангыз кеси, сюйсе уа къауумланы санында къошулургъа боллукъду. Анда билим алгъанлагъа уа ахырында тийишли сертификатла берилликдиле.

«Вебинарлагъа бизни республикада сейир уллуду: былтыр тийишли дерслеге кёп къалмай 7,6 минг кере къаралгъанды. Ол а буруннгу жылдан эки кереге кёпдю, - дегенди Банкны бизни республикада бёлюмюню башчысыны орунбасары Балаланы Расул. – Онлайн-дерследе адамла ахчаны къолдан -къолгъа бермей,  къоркъуусузлу кёчюрюрге, финанс план жарашдырыргъа, хыйлачылагъа алданмазгъа, банкла берген жумушланы тенглешдирирге эмда сайларгъа юйренедиле. Аланы, дагъыда, экспертлеге сорууларын берирге эм аладан тынгылы жууапла алыргъа онглары боллукъду».

Алай бла бу вебинарлагъа къатышыргъа сюйгенле аны юсюнден толу хапарны https://pensionfg.ru сайтда табарыкъдыла, регистрацияны да анда ётерге боллукъдула.