Сабийлени илмугъа, энергетикагъа да сейирлерин къозгъагъан байрам

«РусГидро» компанияны Къабарты-Малкъарда бёлюмюню келечилери Нальчикде культура айнытыу араны окъуучуларына «Илмуну» кюню деген ангылатыу-оюн жумуш къурагъандыла. Бу байрамны ала сабийледе илмугъа, технологиялагъа, энергетикагъа сейирлерин къозгъарча бардыргъандыла. Аны кезиуюнде женгил эмда ангылашыныулу халда электрокючню юсюнден да кёп магъаналы зат айтылгъанды.

Программа «Смешарики» суратлау фильмни «Электробитва» сериясындан башланнган эди. Ол а сабийлени электрокюч не зат болгъаны эмда аны къоркъуусуз хайырланыу жорукълары бла шагъырейлендиргенди. Ызы бла тематика викторина да бардырылгъанды. Берилген соруулагъа жууап излерге гитче къауум кёл салып кюрешгенди, ала бу теманы иги билгенлерин да кёргюзтгендиле. Айырмалыланы уа компанияны келечилери саугъала бла къууандыргъандыла.

Байрамны эм сейирли кесеги Тесла-шоу болгъанды. Сабийле электрокюч къалай ишлегенин, сейирлик сынам затланы да кеслери кёзлери бла кёргендиле, илмугъа къатышыргъа, тинтиучюле болургъа онг тапхандыла. Кёргенлерин, эшитгенлерин бек жаратханларын бир да жашырын этмегендиле.

Быллай жумушла компанияны ишинде социал эмда жарыкъландырыу жаны бла магъаналы жерни аладыла. Билим бериуде башламчылыкълагъа, ёсе келген тёлюде илму сагъышланы айнытыугъа, энергетикагъа эмда саулай тёгерекдеги къудуретге жууаплы къарам къураугъа «РусГидро» уллу эс бурады. Аны себепли тийишли проектлени мындан арысында да бардыра турургъа таукелди.