Жангы мардалагъа келиширикди

Бюгюнлюкде Нальчикде «Узакъ эм тири жашау бардырыу» миллет проектге кёре, къыстау жангы излемлеге келишген Онкология диспансерни къурулушу барады. Ол ишлеп башласа, саусузла бийик технологиялы болушлукъ алыргъа онг табарыкъдыла, деп билдириледи Къурулуш эмда жашау журт-коммунал мюлк министерствосуну пресс-службасындан.

Айтханыбызча, проект санитар-эпидемиология мардалагъа бла излемлеге келиширча тюрлендирилгени себепли жарты ишленип къалгъан объектни талай жерлерин оюп кетерирге эм кенгертирге тюшгенди. Жангы диспансер а кёп къатлы алты багъыу блокладан къураллыкъды. Барында да саусузлагъа 250 жер боллукъду. Дагъыда бир сменнге жюз адамгъа къарар онглары болгъан поликлиника да ачыллыкъды. Мында лучевой, химиотерапия, хирургия эм кюндюз жатханлагъа багъарча стационар да боллукъду.

Аны хирургия корпусуну экинчи къатында эндоскопия, фотодинамика диагностика эм терапия бёлюмле ишлерикдиле. Аланы хайыры бла аурууну башлана тургъан кезиуюнде тинтирге онг табыллыкъды. Ол санда аш орунлары бла чегилери ауругъанланы да.

Радиология блокда лучевой терапия бла опухольгъа радиация этип багъарыкъдыла. Андан сора да, радиоэмболизация да этилликди. Аны кезиуюнде радиациялы материалны къан тамырла бла ауруу къозгъалгъан жерге жиберликдиле.

Саулай алып айтханда, жангыртылгъан медицина арада онкология бла байламлы аурууланы къайсы бирине да багъарча мадар этилликди.

Бюгюнлюкде планда белгиленнгенича, корпусланы барысы да сюелтилиннгендиле, алада тыш къабыргъаларын сюртюп эм ичлеринде жумушла бла кюрешедиле. Ол санда ток чыбыкъланы, жылыу берген системаны, таза эм кир суу баргъан быргъыланы тартадыла, вентиляцияны, лифтлени жарашдырадыла, ич къабыргъаларын сюртедиле, бояйдыла, эшик- терезе саладыла, регистратура боллукъ жерни жарашдырадыла эм башха жумушланы да тамамлайдыла.

Аны бла бирге модуль котельня, ток бла тынгылы жалчытырча эки трансформатор подстанция да жарашдырылгъандыла. Жууукъ заманда аланы ишлетип башларча мадар этилликди. Къурулуш ишле бошалгъанлай,  тийишли оборудованияны да салып башларыкъдыла.

Эсге сала айтсакъ, Онкология диспансерни къурулушу  2022 жылда башланнганды, планнга кёре, ол быйылдан кеч къалмай хайырланыргъа берилирге керекди.