Бирликни эмда къонакъбайлыкъны белгиси бла

Смоленск шахарда къонакъбайлыкъны «Россейни халкъларыны бирлиги» деген ат бла бардырылгъан жыйылыуунда Россейни рекорду тохташдырылгъанды, анга къыралны 64 региону, ол санда уа Къабарты-Малкъар да къатышхандыла. Ала, бирге жыйылып, шуёхлукъну бла биригиуню белгисича, «Катюша» жырны жырлагъандыла.

Республикабызны анда Къонакъбайлыкъны битеумиллет индустриясыны СКФО-да бёлюмюню келечиси «Валькирия» турист компанияны генеральный директору Анна Наумова кёргюзтгенди. Къабарты-Малкъар бла ол жыйырма жылдан асламны байламлыды: 2011 жылдан бери мында турист башламчылыкъланы тамамлайды, экскурсоводланы аттестацияларын бардыргъан комиссиягъа киргенди, «Эльбрус» курортну айнытыугъа да юлюшюн къошханды. 

Анда жыйылгъанлагъа, республикабызда адамланы солууларын къурауда къаллай онгла болгъанларыны юсюнден айта, бюгюнлюкде Къабарты-Малкъар Россейде тау туризмни араларындан бири болгъанын энчи белгилегенди. «Минги таугъа саржеледе учууну сюйген адам жыл сайын аслам келедиле, аланы ёсе да барады, ол а Элбрус «Россейни эм иги тау лыжа курорту» деген атха тийишлилигин, айхай да, кёргюзтеди. Бизде канат жол солугъанланы 3847 метр бийикликге дери жетдиреди, алайдан а дунияда эм бийикде орналгъан канат жолгъа минерге боллукъду», - дегенди ол.

Аны бла бирге республикабызны ёхтемлиги жангызда канат жолла бла спортда жетишимле тюйюлдюле. Чертилгенича, Къабарты-Малкъарда илму-излем ишле бардырыладыла, космос тинтиледи. Ындырчи тауну тюбюнде, жер тюбюню эки километр теренине кетип, Басхан нейтрин лаборатория ишлейди, ол Россейде жангызды. Солууда бла саулукъ кючлеуде энчи жерни багъыу гара суула, алма бахчала аладыла. Ала барысы да регионну аслам миллетли жамауатыны кёп жылланы ичинде къыйыныны эсебидиле.

Ызы бла жыйылыуда интерактив викторинаны кезиуюнде республикабызны эм ариу жерлери кёргюзтюлгендиле, адет-тёрелени, миллет азыкъланы, маданиятыбызны юсюнден айтылгъанды, эм тирилеге уа эсде къалырча саугъала бла татлы ашарыкъла берилгендиле, деп билдиредиле республикабызны Курортла эм туризм министерствосундан.