Промышленностьда онгла бла шагъырейленирча

Россей Федерацияны Сатыу-алыу–промышленность (ТПП) палатасында «Промышленность туризмни къурау» билим бериу модуль бардырылгъанды. Анга бу палатаны регионлада, ол санда КъМР-де келечилери, предпринимательлени биригиулерини халкъла аралы институту, стратегиялы башламчылыкъланы Агентствосу эмда бизнес-коммуникацияланы Агентствосу къатышхандыла, деп билдиргендиле ТПП-ны Къабарты-Малкъарда бёлюмюнден.

Промышленность туризм арт жыллада айнып баргъаны кёрюнеди. Анга кёплени сейирлери барды. Ол а не бла байламлыды десегиз, быллай туризм тёгерегибизде болгъан кёп затха тюшюнюрге, производстволаны жашырынлыкълары бла шагъырейленирге онг бергени бла.

Промтуризм тарых шартланы, жетишимлени, тюрлю-тюрлю усталыкъладан адамланы, усталыкъланы кеслерини, илмуда умутланы, болмагъанча аллай технологияланы эмда производстволаны юслеринден хапарлайды. Бизни къыралда эмда республикада кёп предприятияла кеслеринде производстволаны жангыртадыла эмда кенгертедиле. Аны уа къыралны инсанлары кёрселе иги боллукъду. Алай бла промтуризм кесинги къыралынгы онглары бла шагъырейленирге, аны бла ёхтемленирге амал береди.

Сагъынылгъан билим бериу программагъа 33 региондан жарым жюзден артыкъ инсан къатышхандыла. Хар бири да кеси жашагъан жерни, промышленность туризм аны социал-экономика жаны бла айныуунда нечик магъаналы болгъаныны юсюнден хапарлагъанды. Сора промышленность туризмни айнытыугъа къатышырыкъ предприятияланы эмда хар тёлюге да тийишли экскурсия маршрутланы туура этгенди.

Къабарты-Малкъардан презентациясын ТПП-ны регионда бёлюмюню келечиси Дарья Фролова туура этгенди. Буруннгу жылда ол Тырныауузда тау ишчини кюнюн бардыргъан эди. Аз кечирек а Басхан ауузунда «КъМР-ни илмусуну эмда промышленностуну тарыхы» деген индустриялы экскурсия къурагъанды.

Жангы проектге «Техно Алмаз» ООО-ну башчысы Р. М. Токов да къатышханды. Аны предприятиясында цехлеге эмда болгъан онглагъа къарап, ары келликлеге излемлени эмда къоркъуусузлукъ жорукъланы тохташдыргъандыла. Ызы бла 7-9 классланы окъуучуларына «Налмас технологияла: ичинден къарам» деген экскурсия программаны жарашдыргъандыла.