Маданият байлыгъыбызны кёргюзтгендиле

Бу кюнледе Нальчикде Музыка театрда Россейни халкъларыны бирлигини жылына аталып халкъ коллективлени усталыкъларыны уллу фестивалы болгъанды. Анга республиканы битеу районларындан бла шахарларындан келечиле къатышхандыла.

Элбрус район жаланда табийгъатыны тамашалыгъы бла белгили тюйюлдю. Ол маданият жарыкъландырыу эм чыгъармачылыкъ иши бла да атын хар заманда алчыланы санында айтдырады. Бусагъатда районда тёрт юлгюлю эм бир халкъ ансамбль ишлейдиле. Ала бизни узакъладан, ата -бабаларыбыздан келген тепсеу хазнабызны айнытыуда уллу къыйын саладыла эм жетишимлидиле. Андан сора Отарланы Омар атлы краевед музей, Абайланы Солтан-Бек атлы искусстволаны школу, халкъ чыгъармачылыкъны эм усталыкъны арасы бла китапханала бардыла.

Бу кюнледе «Мой край – Кабардино-Балкария» деген халкъ коллективлени усталыкъларына къарау гала-концерт болгъанды. Анда Элбрус районну Кёнделен элини «Таулан» ансамбли, «Сияние гор» миллет тепсеулени юлгюлю ансамбли, Къулийланы Къайсын атлы Маданият юйюню «Салам» миллет тепсеулени юлгюлю ансамбли бла Абайланы Солтан-Бек атлы искусстволаны школуну «Арабеск» юлгюлю хореография ансамбли, «Жулдузчукъла» юлгюлю жыр къауум усталыкъларын кёргюзтгендиле.

Отарланы Омар атлы краевед музей халкъыбызны тарыхыны бла маданиятыны юсюнден хапарлагъан гитче кёрмюч хазырлагъанды. Анда кёргюзтюлген экспонатланы араларында кийиз эм Минги тауну эм аны тийрелерини ариулугъун, туугъан жерибизни байлыгъын кёргюзтген суратла бар эдиле.