Сёлешгени – ариу, къоллары – уста

Мирныйде жашагъан Ахматланы Зурият бу кюнледе редакциягъа врачлагъа ыспас эти,  письмо жазып жибергенди.

«Бир адамла бардыла да, ала бла бир кесек окъуна сёлешсенг, жюрегинге бир сейирлик жылыулукъ, хошлукъ келеди. Аллайланы бетлеринде огъурлулукъ сезилип турады, кёзлеринде жашаугъа ышаныулукъ берген жилтинчикле жанадыла. Москвада Н.И.Пирогов атлы клиникада мен ма аллай ахшы адамлагъа тюбегенме. Аланы жашагъан ёмюрюмде унутурукъ тюйюлме. Анда ишлерин билген, аны тынгылы тамамлагъан, атлары дуниягъа айтылгъан, жашауларыны онла бла жылларын бу ахшы да,  огъурлу да  ишге жоралагъан врачла, алимле кёп болгъаны жамауатха, бютюн да бег а,  саусузлагъа уллу насыпды.

Аланы араларында бизни  жерлешибиз,  сабийлеге операция этген хирург Трамланы Далхатны къызы Жаннета да болгъаны, атын махтау бла айтдыргъаны да къууандыргъанды.

Энди ол  врачланы къолларына къалай бла тюшгенибизни юсюнден къысха айтайым. Жашыбыз туугъан кюнюнден бери да  ашаргъа унамай,  жилягъанлай тургъанды. Уллу бола баргъаны бла уа терк окъуна арып, къарыусуз болуп, орамда тенглери бла да ойнаялмай юйге къайтып къала эди. Атасы шахаргъа сабийле ойнаучу жерлеге элтейим, кел десе да, бек сюймей баргъанды. Болсада анда да кёпге мычымагъанды. Юйге къайтайыкъ, арыдым, деп жилямсырап башлар эди. Ючюнчю классха дери окъуп келгенди. Насыпха, окъугъан а бек иги эте эди. Не заманда да жаныуарлагъа эс буруп, пластилинден аланы суратларын ишлерге да сюйгенди. Болсада аш ашамагъаны уа  къайгъы этдире эди мени. Нальчикде кёп врачлагъа баргъанбыз, къаратханбыз. Алгъа неси ауругъанын тохташдыралмай, къыйналыргъа да тюшгенди. Болмагъандан сора уа,  бизни Москвада Н.И.Пирогов атлы клиникагъа ашырадыла.

Ары  келгенибизлей окъуна, тынгылы тинтип, талагъын, ётюнде уа ташларын кетерирге кереклисин айтадыла. Алай бла бир жолгъа  эки операцияны да этедиле. Артда билгенме, Жаннета Далхатовна ол операция этгенледен бири болгъанын эмда иги  кесек  жумушну да тамамлагъанын. Андан сора да, ол кюн сайын палатагъа келип, жашны халин билип, кеси бла да  сёлешип турду. Операциядан сора ючюнчю кюнюнде жаш ундурукъдан къобуп, биринчи атламларын кеси аллына этип баргъанын кёргенинде уа, ёз баласынача къууанды. Врачла барысы да бизге бек иги  болгъандыла, алай Жаннета Далхатовна уа энчи къайгъыргъанды. Дагъыда къайтарып айтама, мен жашагъан ёмюрюмде аны ол игилигин бир заманда да  унутмам.

Биз клиникадан бир ненча кюнден кетгенибизден сора да, ол юйюбюзге телефон бла сёлешип, жашны саулугъундан хапар билип турду. Аны бла бирге уа анализлени да берип, манга жиберигиз бир къарайым, ол, бу дарманны ичирирге унутмагъыз деп, бюгюнлюкде да къайгъыргъанлай турады. Туугъан жеринден узакъда аллай билимли, тынгылы врач къызыбыз болгъаны бла мен бек ёхтемленеме. Операция этилген жаш а Аллахны эмда врачланы  ахшылыкъларындан тириди, спорт бла да кюрешеди. Мен иш бла булжуп къалсам, Жаннета Далхатовнагъа сёлешип, байрамла бла алгъышлайды, кесини юсюнден хапар айтады».

Зурият биргелерине жатхан башха саусуз сабийчикни анасыны «Ыразылыкъны  китабында жазгъанын да юлгюге келтиргенди: «Бу клиникада ишлеген битеу коллективге жюрегими теренинден ыспас этеме. Сабийлеге, аналагъа да бек  иги боладыла. Бизни врачыбыз Трамланы Жаннетагъа уа энчи  ыразылыгъымы айтама. Ол бек  къайгъырыулу, ариу тилли, ишин тынгылы билген специалистди. Биз клиникада тургъан бир ненча кюнню ичинде, иши не кёп болса да, сабийге  къараргъа, ариу  сёз айтып, ышаныулукъ берирге, къууандырыргъа унутуп къоймагъанды. Аны бла бирге уа мени битеу сорууларыма да тынгылы жууап берип тургъанды.

Бизге уа къыйын операция этилген эди, жашымы кёкюрегине пластина салгъандыла. Хар зат да бийик даражада бардырылгъанды. Операциядан сора да бизге Жаннетаны къайгъыргъаны чыртда тюрленмегенди, ол угъай  да, бютюн жууаплы къарагъанды. Жаннета мен жашауумда тюбеген бек иги врачладан бириди, сау болсун, Аллах  саулукъ, насып да берсин анга, аны ата-анасына да  ол  бизге этген  болушлугъу ючюн», -деп жазгъанды Донецкеден келген Елена Пхитикова.

«Аллай жазыула Жаннетни аты бла кёпдюле клиникада,-деп жазгъанды андан ары Ахматланы Зурият. –Аланы барысын да  жазып алыр онг тапмагъанма. Ала уллу Россейни кёп жерлеринден келген саусузланы ыразылыкъларыдыла. Билгенимча, Трамланы Жаннета Пирогов атлы клиникада ишлегенли жыйырма жылдан артыкъ болады. Ол кезиуню ичинде кёп жашчыкълагъа бла къызчыкълагъа  жашаугъа ышаныулукъ бергенди. Ол бакъгъан балачыкъла саулукълу болуп ёсгенлеринден уллу саугъа жокъду анга. «Миллет адетледе  ёсген таулу къызыбыз ариу тиллилиги, адежлиги бла да айырмалыды. Биз аны къол аязыбызда жюрютебиз»,- дегенди Жаннетаны биргесине ишлеген хирург, медицина илмуланы кандидаты Дионис Петров, мен анга Трамланы къыз мени жерлешимди дегенимде. 

Жаннетаны кабинетине кирип, сени юсюнгден республикалы газетге жаздырлыкъ эдим деп тилегенимде, ол, ийменип: «Мен аллай бир не игилик этгенме, жаланда ишими кереклисича тамамлайма»,- деген эди.

 Артда билгенибизча, ол Къабарты-Малкъар къырал университетни да айырмалы бошап чыкъгъанды. Ординатураны Москвада бу клиникада ётерге баргъанында уа, анга алгъа иги кесек тинтиуледен, сынауладан ётерге тюшгенди. Андан сора да , биринчи заманлада узакъ тау  шахардан келген къызгъа ышаныулукъ артыкъ уллу тюйюл эди. Ординатураны заманы бошалгъанда уа, Жаннетни анда тыяр ючюн, дуния бла бир сылтаула этип, артха иерге унамай къойгъандыла. Баям билимли, ишни  сюйген, анга битеу жюреги бла берилген адамла къайда да бек керекдиле. Бу клиникада уа бютюнда».