Бу айда кюч алгъан законла эмда жорукъла

Ана капитал эмда талай башха тёлеуле уллуракъ болгъандыла, юйюр ипотека башха тюрлю берилликди, тюкенледе уа техниканы къайтарыу жорукъла тюрленнгендиле. Аланы эм быйыл февральда кийирилген башха жангычылыкъланы юсюнден объясняем.рф къырал порталда жарашдырылгъан материал бла шагъырейлендирейик.

Сабийлери болгъан юйюрлеге тёлеулеге къошхандыла.

Алай бла энди, быйыл биринчи февральдан башлап, ана капитал быллай бир болгъанды: биринчи сабийге – 728,9, экинчиге (биринчисине алмагъаннга) – 963,2 минг сом.

Сабий туугъанда неда аны кесине алгъанда,  бир кере берилген пособие 28,5 минг сомду энди. Сакъат неда жети жылдан тамата, сора къарындаш неда эгеч сабийлени ёсдюрюрге алгъаннга уа 217 минг сомдан артыкъ тёленирикди.

Жыл бла жарымы толмагъан сабийге къарагъаннга ай сайын тёленнген пособияны эм уллу ёлчеми 83 минг сом бла чекленирикди.

Юйюр къурагъанла юйюр ипотеканы жаланда бир кере хайырланаллыкъдыла.

Алгъын ала аны хар бири да башха-башха алыргъа боллукъ эдиле. Энди уа кредитни (6 процент бла) саулай юйюрню аты бла бир кере берликдиле. Алай ипотеканы тёлеп бошагъандан сора алада энтта да сабий тууса, быллай кредитни жангыдан алыргъа боллукъдула.

Цифралы паспорт асламыракъ онг берликди.

27 февральдан башлап адам кесини инсанлыгъына «Госуслуги» порталда документин кёргюзтюп,  шагъатлыкъ эталлыкъды. Бу амал связь салонлада эмда медицина клиникалада (ол анда ары дери кесине къаратып, къагъыт паспортун кёргюзтген эсе) берилликди. Ол кюннге дери уа электрон удостоверенияны жаланда страховой компаниялада эмда банклада аладыла.

Белгиле товарланы энтта да талай тюрлюсюне салынырыкъдыла.

Бу айны онбиринден башлап, «Честный знак» белгини тюклю тонлагъа, тюклю териледен этилген къол къаплагъа эмда жагъалагъа салып тебирерикдиле. Къырал аны бла жалгъан эмда тапсыз товарла чыгъарыугъа къажау тургъанын кёргюзтеди.

Февральны биринчисинден а ол белгини адамны солуу онгларына реабилитация этиу затлагъа салып башларгъа керекдиле.

Бизнесге тазир салыуну жумушатхандыла.

Сатыучу алгъын товаргъа (гарантия бла) заманында ремонт этмесе, аны жангысына алышмаса неда алыучугъа ахчасын къайтармаса, экинчиси  даулагъан багъаны экиден бири тенгли тазир тёлерге керек эди. Энди уа (1 февральдан башлап), иш былай болса, аны салыу къаллыкъды:

- алыучу товарны ремонтха кеси келтирмесе эмда андан алмаса;

- алышырча товар неда техника керекле заманында келмеселе;

- эки жаны да ишни сюдге жетдирмей келишген эселе.

Техникалы товарланы къайтарыу жорукъла тюрленнгендиле.

Сёз ючюн, тапсыз ишлеген телевизорну тюкеннге къайтарыргъа умут этсегиз. Аны багъасы кётюрюлген эсе уа, тюкен ол артыгъын кесигизге берирге керекди.

Кесекледен багъыуну жорукълары эмда адамны жашаууна магъаналы дарманланы тизмеси да тюрленнгендиле.

Энди бу айны биринчисинден башлап, тамата тёлюню кесекледен тогъуз кюн чакълы багъарыкъдыла. Алагъа дагъыда анализлени эмда керек болгъан дарманланы тизмелерин жарашдыргъандыла. 24 февральда уа, адамны жашаууна магъаналы дарманланы тизмесине жангыларын къошарыкъдыла – ракдан, анемиядан эмда туберкулёздан бакъгъанда изленнгенлени.