Баш къайгъырыуубуз саулукълу, ариу къылыкълы тёлюню ёсдюрюудю

Россейни ДОСААФ-ыны Къабарты-Малкъарда бёлюмюне Хасан Евгажуков 2024 жылдан бери башчылыкъ этеди. Андан бери мында иги жанына кёп тюрлениуле этгенди, ырысхы онгларын да игилендиргенди. 2025 жылда ДОСААФ-ны  Москвада бардырылгъан VIII съездине да къатышханды.

Жаш тёлюню аскер-патриот ниетде  юйретиу, физкультурагъа бла  спортха бютюн  тири къатышырча этиу жаны бла  да кёп иш бардырады. Бюгюн Хасан Евгажуков редакцияны къонагъыды. 

- Хасан Алиевич, ДОСААФ-да къаллай усталыкъла алыргъа боллукъду?

- Тракторчуну, къоркъуулу жюкле ташыгъан ауур эмда женгил машиналаны жюрютген А,В,С, Д, Е категориялы шофёрлагъа эмда аскер-эсеп усталыкълагъа. Юйрениулени кезиуюнде жаш адамла практиканы, теорияны, медицина эмда психология жаны бла да билим аладыла. Ахырында алагъа энчи документле бериледиле.

Юйретиу ишни сынаулу инструкторла бардырадыла, автомобиль школ а теория эмда практика иш бла жалчытады. Дагъыда бизде бухгалтер эсепге, организацияны башчысыны болушлукъчусу болургъа, сатыу этген усталыкълагъа да юйретедиле. 

- Ишигизни районла бла байламлыкъда бардырыуну магъаналыгъа санагъаныгъызны да билеме, ала бла бирге не мадарла этесиз?

- Къуру районла бла угъай, Тырныаууз, Прохладный, Майский, Терек, Басхан шахарла бла да уллу байламлыкъда ишлейбиз. Алада окъуучуланы араларында «Тирилик эм саулукъ» деген спартакиадала бардырабыз. Саулукъну, Женгил атлетиканы, Физкультурачыны кюнлерин, лыжа спорт бла кюрешгенлени эришиулерин, чемпионатланы да ётдюребиз.

Окъугъан жаш адамланы араларында асламлы спорт иш Элбрус, Басхан, Чегем, Черек, Прохладна, Терк, Урван районлада бютюн иги къуралгъанларын белгилерге сюеме. Алада физкультура-спорт къымылдауну, аскер-патриот ниетде юйретиуню тирилтиуге район, жер-жерли администрацияла, физкультура эм спорт комитетле уллу себеплик этедиле. Аны ючюн алагъа бек ыразыма.

- Не букъдурлугъу барды: жаш адамланы араларында санларындан къыяулула да бардыла. Алагъа уа не мадар?

- Аллай жашла бла къызла спортдан бир жанында къалмаз ючюн, алагъа деп республикада «Вершина» клуб ачылгъанды эмда ишин бардырады. Ары Нальчикден бла районларыбыздан кёпле келедиле. 

- Саулукъну кючлеуге спорт уллу себеплик этгени баямды, анга не къадар кёп жаш адам къатышыр ючюн не мадар этесиз?

- Жаш адамланы саулукълу, къарыулу, аны бла бирге уа тюз ниетли, ариу къылыкълы болурларына физкультура бла спорт, керти окъуна, уллу себеплик этедиле. Ала бла не къадар кёп адам кюреширча этиуге районлада бла шахарлада РОСТО-ну организациялары, сабий-жаш тёлю спорт школла кёп къыйын саладыла. Юлгюге Прохладныйни спорт школун, Нальчикде Футболдан энчи сабий-жаш тёлю школну, Элбрус районда «Геолог» спорт комплексни, Черек районда «Оками» клубну, дагъыда кёп башхаланы келтирирге боллукъду.

- Аллай магъаналы ишге тийишлисича эс бурмагъанла да болурла?

- Жарсыугъа, бардыла. Бу магъаналы ишге хар жерде да бирча эс бурулмайды. Бир-бир районлада бюгюн ёсюп келген жашла тамбла къыралыбызны къоркъуусузлугъун къорууларыкъ аскерчиле боллукъларын унутуп къоядыла. Болсада арт жыллада элледе, районлада, шахарлада зоналы спартакиадала бардырылып башланнгандыла. Алагъа республиканы битеу районларыны спортчулары бирча тири къатышмагъанлары жарсытады. Аны эсге алып, тохтаусуз ангылатыу иш бардырабыз.

- Республикада физкультура бла кюреширге сюйгенле уа кёпмюдюле?

- Башда айтханыбызча, физкультураны, спортну сюйген жашчыкъла бла къызчыкъла кюнден-кюннге кёпден-кёп бола барадыла. Ол а къууанырча шартды. Тюрлю-тюрлю спорт секцияла, саулукъну кючлеу къауумла къураладыла, элледе ауур атлетика, тутушуу, гиря спорт бла, каратени тюрлюлери бла кюреширге, волейбол, футбол да ойнаргъа онгла болгъанларын да айырып айтырчады. Жаланда аланы толуракъ хайырланыргъа керекди.

- РОСТО къурагъан спорт секциялагъа жюрюр ючюн ахча тёленемиди?

- РОСТО къурагъан ишлеге аны клубларына жюрюгенледен хакъ хазна алынмайды. Алай бир-бир спорт комплекследе физкультурадан бла спортдан хакъ тёлеп жараула бардырыугъа аслам эс бурула башланнганды. Сёз ючюн, Нальчикдеги «Спартак» спорт базагъа, шахарчыладан сора да, хасаниячыла, акъ суучула, шалушкачыла, вольный ауулчула да келедиле.

Хакъ тёлеялмагъанланы уа биз кесибизни клубларыбызгъа чакъырабыз. Республиканы ара шахарында беш спорт зал, юч стадион эм спорт дворец бардыла. Саулукъландырыуда онеки бёлюм аллай башламчылыкъда ишлейдиле эм планларын артыгъы бла толтурадыла.

- Алгъын предприятиялада да спорт бла кюреширча онгла къуралгъандыла, шёндю уа ала бармыдыла?

- Хау. Сёз ючюн, Нальчикде алгъын машинала ишлеучю заводда КъМР-де Ич ишлени министерствосу ишчилерине спорт комплексле, залла да къурагъандыла. Шахарда эрттеден бери ишлеп тургъан спорт комплексге да ремонт этилгенди, Чегем шахарда, Черек районну Жемтала элинде, дагъыда кёп башха эллени бирлеринде жангылары ишленип, башхаларында тынгылы ремонт этилип, аламат спорт комплексле хайырланыладыла. Хасанияда да бек иги спорт зал барды, болсада, элни уллулугъун эсге алып, дагъыда бир спорт комплекс ишлене турады. Ол да быйыл хайырланыргъа берилликди.

Элбрус районну «Геолог» спорт комплексине озгъан жылда тынгылы ремонт этилгенди, иги да жангыртылгъанды, кёп оборудование да алыннганды, анда гимнастикадан, ауур атлетикадан да залла бардыла. 

Хар керекле бла да жалчытылгъан спорт залла республиканы башха районларында, эллеринде да болгъанларын чертип айтыргъа тийишлиди. Битеу ол затла Къабарты-Малкъарда жаш тёлюню саулукълу болурча этиуге, физкультураны бла спортну айнытыугъа себеплик этедиле.

Сёзсюз, жыл сайын ДОСААФ-да болгъан жангы затланы да эсге алып, борчубузну айыпсыз толтурургъа кюрешебиз.