Илмуну кюню хунерлилени бирикдиргенди

Россей илмуну кюнюн Элбрус районну мектеплеринде бийик даражада белгилегендиле.

Кёнделенни Энейланы Тимур атлы 4-чю номерли школунда байрамгъа аталып «Илмуда биринчиле» деген оюн бардыргъандыла. Аны «Единая Россия» партиядан Кёнделен элни жер-жерли самоуправлениясыны депутаты Атмырзаланы Мухтар къурагъанды.

Эм алгъа окъуучула Россейни Илмуларыны академиясыны къуралыу тарыхы бла дерсде шагъырей болгъандыла. Анда атлары айтылгъан алимлени кёбюсюню юслеринден тынгылы билдириуле этилгендиле. Россейни илмусун айнытыуда жерлешлерибизни салгъан къыйынларын энчи черте, ала ёсе келген жаш тёлюге юлгю болгъанларын белгилегендиле, ала бла ёхтемленнгенлерин айтхандыла. М.В. Ломоносовну, И.П. Павловну, Д.И. Менделеевни, К.Э.Циолковскийни, П.Л. Капицаны, Л.Д. Ландауну, И.В. Курчатовну илмуну айныуунда уллу къыйынлары болгъанын да белгилегендиле. Ёсе келген тёлюге быллай адамланы юслеринден хапарлау аланы жюреклеринде журтлары, адамлары ючюн энчи ёхтемлик туудурады. 
«Единая Россия» партиягъа да Россейни илмусуна тутхучлукъ этиу эм магъаналыды. Партияны халкъ программасында да илмуну айнытыугъа жораланнган энчи бёлюмле да бардыла.

Тырныауузну 5-чи номерли гимназиясында да Илмуну кюнюне жоралап кёп тюрлю байрам ишле ётгендиле. РФ-ни Президенти В.В.Путинни буйругъу бла быйыл Халкъланы бирликлерине жораланнган жыл болгъаны себепли гимназиячыла, аны да чертип, ишлерин алай къурагъандыла.

Байрам кюнню сыйлы къонакълары уа Элбрус районну жер-жерли администрациясыны башчысыны биринчи орунбасары Толгъурланы Расул, районну Билим бериу управлениясыны таматасы Атаккуланы Нюржан, КъМР-ни «Биринчилени атламлары» биригиуюню регион бёлюмюню председателини орунбасары Забакъланы Азамат, биригиуню советини проектле жаны бла таматасы Сарбашланы Халимат, биригиуню районда ишлерин къурау жаны бла специалисти Жаппуланы Мадина, районну Жаш тёлю арасыны таматасы Этезланы Аслан ишчилери бла бирге  болгъандыла. 

Къонакъланы, байрамгъа къатышхан устазланы бла окъуучуланы алгъышлай, гимназияны таматасы Моллаланы Фатима ол башчылыкъ этген мектепде илмугъа, сабийлени ол жаны бла айнытыугъа къачан да уллу эс бурулгъанын чертгенди. Бюгюннгю сабийле билим алыргъа, сайлагъан усталыкъларында фахмуларын ёсдюрюрге итиннгенлерине бек къууаннганын да айтханды. 

Бу кюнню эм магъаналы кесеги уа «Эврика» илму клубну ачылыуу болгъанды. «Илмуда биринчиле» проектни чеклеринде быллай клубла къыралны 30 регионунда ачылгъандыла. Тырныауузну 5-чи номерли гимназиясы да аланы санына киргенди. Бу проектни чеклеринде бардырылгъан илму-излем, тинтиу эришиуге къатышып, ала алчы жерге тийишли болгъандыла. Анга уллу къыйын салгъан гимназияны таматасыны юйретиу жаны бла кенгешчиси, «Биринчилени атламлары» биригиуню гимназияда таматасы Асадуллаланы Элина окъуучуланы да сейирлери уллу болуп, ол жумушха тынгылы хазырланнганларын энчи белгилегенди. Аны себепли къыралны эм бийик жеринде ачылгъан «Эврика» илму клуб сабийлени бла жаш тёлюню араларында тийишли жерин табарыгъына ийнаннганын айтханды. Клубну уа Толгъурланы Расул бла Забакъланы Азамат къууанчлы халда ачхандыла.

Ол кюннге жораланып мында дагъыда кёп аламат жумуш къуралгъанды. Программадан тышында дерследе сабийлени кеслери билген затлагъа илму кёзден къарар онглары болгъанды. Спорт эришиуле бла экскурсияла да окъуучуланы эслеринде къаллыкълары хакъды. Байрам кюнню уллу концерт бла бошагъандыла. Гимназиячыла да, Россейни халкъларыны араларында шуёхлукъну кючлеуге юлюшлерин къоша, миллет энчиликлени, тарыхны, маданият байлыкъны да билгенлерин кёргюзтгендиле. Ол а Ата журтубузну кючю аны халкъларыны шуёхлукъларында бла бирликлеринде болгъанына дагъыда бир кере шагъатлыкъ этгенди.