Ток ючюн тёлемегенле жууапха тартыллыкъдыла

Кёп болмай «Россети Северный Кавказ»-«Каббалкэнерго» компанияны  Нальчикде бёлюмюню келечилери ток ючюн аслам заманны тёлемей тургъанлагъа токдан кесилирге боллукъларына 102 935 билдириу жибергендиле.

Саулай алып айтханда,  аланы 247 миллион сом берликлери барды.   Аладан 99 мингнге жууукъ   абонент токсуз къалмаз ючюн 232,2 миллион сом тёлеп,  борчларындан къутулгъандыла. Болсада уллу кёллюлюк этген 3677 хайырланыучуну  ток ызладан кесерге тюшгенди.   Бюгюнлюкде аланы 12,8 миллион сом берликлери барды.  Ала бла байламлы материалла законодательствону чеклеринде бир тюрлю мадар этилирча  ич ишлени келечилерине берилгендиле.

Эсге сала айтсакъ, эки айдан аслам тёлемеген абонент  ток ыздан кесилирге боллукъду.  Аллай адам  ток бла жалчытылыныр ючюн,  борчун толсунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми  объектни къыйынлыгъына кёре  болады. Сёз ючюн,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165-чи статьясына тийишлиликде эки жылгъа тутулургъа боллукъдула. 

Токдан чеклендирирге къоркъуу чыкъгъанын  хайырланыучула электрон почталарында,  компанияны сайтында «Коммунал жумушладан чеклендириу реестр»  бёлюмню «Клиентлеге» деген кесегинде неда СМС бла жиберилген билдириулеринде окъургъа боллукъдула.  Тёлеулени биригиуню офислеринде тамамларгъа онг барды. Юйлеринден чыгъалмагъанла неда заманларын къоратыргъа сюймегенле, ол санда  башха жерледе тургъанла «Энчи кабинет», «Свет Онлайн» эм «СберОнлайн»  мобиль приложенияланы хайырланыргъа боллукъдуа. Бир тюрлю сылтау бла толусунлай борчун жабалмагъан  реструктуризация этилирча  келишим къураргъа онгу барды. 

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.