Осал къылыкълагъа къажаулукъда биригирге чакъыргъандыла

Жаш тёлюню арасында наркотиклени жайылыууна къажау «Сабийлени саулукълары эм къоркъуусузлукълары ючюн» ангылатыу жумушлагъа тёрт мингден аслам школчу бла аланы ата-аналары къатышхандыла. Жыйылыулагъа жамауат организацияланы келечилери, белгили артистле бла спортчула да къошулгъандыла.

Тюбешиулени кезиуюнде право низамны сакълаучула, врачла-наркологла, власть эм жамауат организацияланы келечилери жашлагъа бла къызлагъа наркотикле адамны саулугъуна салгъан хатаны бла ууну законсуз  сатыу-алыу, асырау ючюн административ эм уголовный жууаплылыкъны юслеринден айтхандыла.

Ангылатыу жумушлагъа дин къуллукъчула да къатышхандыла. КъМР-ни Муслийманларыны дин управлениясыны башчысыны орунбасарлары Мисирланы  Хызыр бла Алим Сижажев, христиан килисаланы благочинныйини болушлукъчусу Ирина Артунова да жаш адамланы жашаулары ючюн жууаплы болургъа, келир заманнга ышаннгылы къараргъа чакъыргъандыла.

Акциягъа белгили спортчула бла артистле   дунияны  ашихара-каратеден чемпиону Шахмурза Шахмурзаев, Россейни бла  Европаны грэпплингден чемпионлары Идар Танашев эм Аскер Петрунин, КъМР-ни сыйлы аристлери Бечелланы Людмила, Мисирланы Жемал эм Мызыланы Аубекир къатышханлары уа тюбешиулени бютюнда жарыкъ, сейир этгендиле, жаш адамланы жетишимлеге кёллендиргендиле. 

Школчула къонакъла бла ачыкъ ушакъ бардыргъандыла, соруула бергендиле, наркотиклеге кеслерини кёз къарамларын айтхандыла. Таматала уа аланы хар неге да ийнанып къалмай, кеслерин оюм, сагъыш этерге чакъыргъандыла, осал къылыкълагъа къажау болургъа, кеслерини жашаулары ючюн жууаплылыкъны ангыларгъа юйретгендиле. 

 Акциягъа къатышханла наркотиклеге къажаулукъда жамауат биригирге кереклисин белгилегендиле.